Июнь 16-дан тура протокол ёзугаар ведомстволар аразының ажылчын бөлүү Тывада конопляларны узуткап кирипкен.
Ук комиссияже наркотиктиг бүдүмелдерни хоойлуга удур садып-саарар талазы-биле чаңгыс аай күрүне политиказын организастаар болгаш боттандырары-биле демисежиринге харыысалгалыг яамылар болгаш ведомстволар кирген, ооң иштинде Хакас болгаш Тыва республикаларда Россияда көдээ ажыл-агый хайгааралының болгаш Тываның Баштыңының Администрациязының регионалдыг айыыл чок чорук департаментизиниң ажылдакчылары кирип турар.
Каа-Хем кожууннуң суурларынче — Бояровкаже, Кундустугже болгаш Ильинкаже үнүүшкүннерниң түңнелинде 8 га девискээрде өзүп турар черлик конопляны илереткен. Аңаа хамаарыштыр комиссия кежигүннери айыткан суурларның чагыргаларының даргаларынга албан күүседир ужурлуг негелделерни хажытканы дээш сагындырыгны кылган. Комиссия республиканың 17 муниципалитединге чедер.
Бистиң корр.
Чурукту интернеттен алган.
“Шын” №24 2025 чылдың июнь 26