2024 чылда Тывага туристерниң ниити саны 10 хуу өзер дээрзи РФ-тиң Президентизи келген соонда илерээн. Баш удур санаашкын-биле алырга, 2024 чылда Тывага 190 муң ажыг туристер кээп дыштаныр.
Чоокта чаа РФ-тиң Президентизи Тывага кээп чорааш, Тыва – онзагай чараш оран-дыр, ынчангаш Тываны сайзырадыры чугула дээрзин демдеглээн. Регионнуң экономиктиг хөгжүлдезиниң кол угланыышкыны – туризм болур ужурлуг деп ол санап турар.
«Делегейде Тыва ышкаш чараш булуңнар ховар. Кайгамчык чараш, бай-байлак, өскелерден агаар-бойдузу-биле онзагай оран. Тывага туризмниң сайзыралын чедип алыр ужурлуг бис. Ынчангаш аалчылар бажыңнарын болгаш дыштанылга баазаларын көвүдедир тудуп, солун турисчи программаларны организастаар болза эки. Ооң-биле чергелештир Тываның онзагай бойдузун ол хевээр арттырары болгаш ховар дириг амытаннарын хумагалаарынче улуг кичээнгейни салыры чугула. Амгы үеде Тываның Арга-арыг болгаш бойдус яамызы «Тыва» деп национал парк тургузарының төлевилелин ажылдап кылып турар деп билир мен» – деп, РФ-тиң Президентизи чугаалаан.
Владимир Путинниң регионга келгеш, тырттырган чуруктары Тываны бүгү делегейге алдаржыдыпкан дээрзин демдеглээли. Ол республиканың езулуг им-демдээ болу берген дээрзин гид-экскурсовод Надежда Кызылаа демдеглээн. Президентиниң Тываның хемнеринге, хөлдеринге балыктап чорааш, тырттырган чуруктары янзы-бүрү солун-сеткүүлдерге үнүп кээрге, туристерниң кичээнгейи Тываже угланып эгелээн. ТР-ниң Баштыңы Владислав Ховалыгның эгелээшкини-биле «Сибирьниң дыштанылгалары» национал турисчи маршрутту ажылдап кылган.
«Федералдыг Чазактың деткимчези-биле Тывада боттанып турар республиканың социал-экономиктиг бот-тускайлаң программазының ачызында туристерге таарымчалыг байдалдарны тургузуп, дыштаныр баазаларны, пансионаттарны регионда тудуп турар. Республикага туризмниң сайзыраарының магадылалын Президент боду тургузуп, Тывага дыштанып кээп, бистиң чуртувусту күштүг кижилерниң дыштаныр чери кылдыр брендини ол боду кылган. Туризмниң хөгжүлдезиниң база бир чылдагааны – турисчи бизнести албан-езузу-биле федералдыг хоойлуга дүүштүр бүрүткедип эгелээнинде. Тываның туроператорлары федералдыг реестрде бүрүткеттинген. А аалчылар бажыңнары болгаш турисчи баазалар чогуур деңнелде» – деп, экскурсовод чугаалаан.
Тываның бойдузунуң өскелерден ылгалы – хемнер, хөлдер, даглар, ховулар доозазының мында бары. Оон аңгыда, малчыннар байырлалы «Наадым» болгаш «Азияның төвүнде хөөмей» дээн ышкаш фестивальдарга соңгаар улуг хоорайлардан кээп турар аалчыларның саны чылдан чылче көвүдеп олурар.
Туризмни сайзырадып турар хууда сайгарлыкчыларны регионнуң удуртулгазы сөөлгү үш чылда аажок деткип, барык 20 ажыг объектини акшаландырган.
Туризмниң хөгжүлдези дээш Президентиниң деткимчези түңнелдиг болуп, чаа-чаа турисчи объектилер туттунуп турар. А Владимир Путинниң Кызылга келгениниң соонда, Тывага дыштаныксаар улустуң саны ам-даа көвүдээр.
/ ТМГ-ниң медээлеринден.
“Шын” №68 2024 чылдың сентябрь 7
