Ѳвүр кожуунда эмчи амбулаторияларыныӊ тудугларын хынап турган.
Кадык камгалалыныӊ баштайгы звенозун чаартыр программаныӊ шугуму-биле бо чылын Ѳвүр кожуунда ийи чаа эмчи амбулаторияны тудуп турар. Ону Россияныӊ Президентизиниӊ шиитпирлеринге дүүштүр боттандырып эгелээн.
Тыва Республиканыӊ кадык камгалалыныӊ сайыдыныӊ оралакчызы Орлан Ондар Ѳвүр кожуунда тудуг объектилерин хынап чораан.
Дус-Даг суурда амбулаторияныӊ тудуу адакталып турар. Ук объектиниӊ 90 хуузу белен дээрзин Тываныӊ Кадык камгалал яамызыныӊ административтиг ажыл-агый эргелелиниӊ директору Урана Моӊгуш дыӊнаткан. Амгы үеде ажылчыннар иштики септелгени чорудуп, техниктиг планны ажылдап кылып турар. Суг хандырылгазын дамчыдар кудук казар ажылды удавас доозар. Дус-Дагда объектиниӊ тудуг ажылдарында 6 ажылчынны хаара туткан.
База Орлан Ондар Саглы суурда эмчи амбулаториязыныӊ тудуунга барып чораан, ында ажылдарныӊ 65 хуузу күүсеттинген. Амгы үеде тѳлевилелди тус черниӊ байдалынга таарыштыр кылып, ооӊ тѳлевилел-смета документациязыныӊ экспертизазын чорудуп турар.
Сантехника херекселдерин, ханаларга болгаш шалага чыпшырар плиткаларны тудугда чедирип каан. Ооӊ-биле чергелештир соӊгаларны, эжиктерни салгаш, чылыглааш, даштын кѳрүштүг кылдыр кылган. Чылыдылга системазын кожуп, иштики ѳрээлдерин ханалааш, ѳрт сигнализациязын кожуп турар.
Ук тѳлевилелдер дээрге регионнуӊ чурттакчыларынга шынарлыг эмчи хандырылгазын чедирер ажылды экижидеринче угланган «Кадыкшыл» национал тѳлевилелдиӊ бир кезээ болур.
/ ТР-ниӊ Кадык камгалал яамызыныӊ медээлеринден алган.
Чуруктарны интернет четкизинден алган.
“Шын” №87 2024 чылдың ноябрь 13
