Варенье — каттар болгаш чимистерни болбаазырадып, белеткеп алыр эң-не нептереңгей арганың бирээзи. Каттарының хевири үрелбээн, чүгле өңү бичии караңгылай берген болгаш чаагай чыды читпээн болза, шын хайындырган варенье деп санап болур.
Июль айда кандыг каттардан варенье кылып болурул? Чымчак, хоюг каттар — малина, честек-кат, инек-караа, кызыл-кат, ежевика, вишня, бичии сливалар, сөөктүг черешня.
Вареньени 3 катап хайындырар. Бир дугаарында, каттарлыг сироп хайны бээрге-ле, эскеш, кезек када тургузар. Ийи дугаарында, вареньени 10–15 минута хайындыргаш, катап база тургузар. Чүгле үш дугаарында улуг отка болу бээринге чедир хайындырар.
Честек-кат, вишня, черешня болгаш сливаны оожум, оон чоорту улуг отка чаңгыс катап хайындырып болур.
Каттарны болгаш чимистерни варенье кылыр хүнде чыырга эки, ылаңгыя аяс хүнде. Чаашкынныг хүнде кат чыгбас.
Каттар болгаш чимистер шупту бир аай бышкан турар ужурлуг.
Вареньениң болу бергенин билип алыры чугула:
Хайнып турар вареньени шопулакка узарга, суук кылдыр дөктүп турар болза, ам-даа болбаан деп билип алыр.
Вареньениң бичии дамдызын тавакка дегзиптерге, чаттылдыр төгүлбес болза, вареньениң болганы ол.
Хайындырыпкан соонда, кыры өремелени бээр болза, варенье болган деп билип алыр.
"Шын" №56 2024 чылдың июль 27
