Тываның Баштыңы Владислав Ховалыг дириг амытаннарны эмнээр, аарыгларга удур профилактиканы болгаш тарылганы чорудар ветеринария албанын республика девискээринге тургузарының дугайында чарлыкка атты салган.
Күүсекчи эрге-чагырганың аңгы органы кылдыр ветеринария албаны 2018 чылга чедир ажылдаан, ооң соонда «Республиканың ветеринария төвү» албан чери кылдыр эде тургускан соонда, регионнуң Көдээ ажыл-агый яамызының составынче кирген деп көдээ ажыл-агый болгаш аъш-чем сайыды Сергей Ондар тайылбырны берген.
Бо угланыышкында ажылдың хемчээли улуг – мал-маганны эмнээри, профилактика ажылы, тарылга дээш. Кажан 2018 чылда ук албанны эде тургузупканда, адырның ажыл-чорудулгазынга шиитпирлээр айтырыглар көвүдей берген.
Регионнуң Баштыңы 2021 чылда ук айтырыгны бодунуң деңнелинге шиитпирлеп эгелээниниң түңнелинде бо хүннерде ук айтырыг шиитпирлеттингени бо. Эрткен неделяда Тываның Баштыңы республиканың ветеринарлыг албанын тургузар дугайында Чарлыкка атты салган. Республиканың мал эмнээшкининге хамааржыр ажылдары ам шуудунче кирип, ветеринарлыг айыыл чок чорукту хандырарынга бурунгаар идигни алыры чугаажок.
/ ТР-ниң Чазааның парлалга албаны.
Чурукту интернет четкизинден алган.