Россия Федерациязының Президентизи Владимир Путин эртип турар чылдың сөөлгү айында төнүп турар чылдың түңнелдерин үндүрген парлалга конференциязын дорт эфирге эрттирери чаңчыл болган чугула ниитилел-политиктиг болуушкун. Россияның хамаатылары-биле ындыг хевирниң харылзаазы Президентиниң чонга ажык-чарлыг чоруунуң херечизи. 2024 чылдың декабрь 19-та Москваның үези-биле 12.00 шакта Россияның Президентизи дорт эфирже үнер. Чон-биле бо чылгы дорт харылзааны “Чылдың түңнелдери Владимир Путин-биле кады” деп адаан.
Төнүп турар чылдың түңнелдерин Күрүнениң Баштыңчызы дорт эфирге үндүрүп, российжи чоннуң болгаш журналистерниң салган айтырыгларынга харыылаар. Президентиге айтырыглар салыксаан кижилер боттарының айтырыгларын программаның moskva-putinu.ru (москва-путину.рф) сайтызын дамчыштыр, 0-40-40 дугаарже чорудупкаш, 8-800-200-40-40 дугаарлыг телефонче долгапкаш, салып болур. Оон аңгыда, Путинге айтырыгларны тускай мобильдиг капсырылга дамчыштыр хүлээп алыр. Айтырыгларның сөстерин болгаш видеоайтырыгларны "ВКонтакте", "Одноклассники" социал четкилер дамчыштыр чорудуп болур.
Айтырыгларны декабрь 8-че дүне “Чылдың түңнелдери Владимир Путин-биле кады” колл-төпте хүлээп ап турар. Бо төп Улусчу фронтунуң төп штавында ажылдап турар.
Дорт эфирге Россияның Президентизиниң парлалга конференциязынга киржир федералдыг болгаш регионнарның массалыг информация чепсектериниң, ол ышкаш Россия Федерациязында аккредитациялыг ажылдап турар даштыкы чурттарның журналистери аккредитацияны эртер ужурлуг. Барыын чурттарның элээн каш массалыг информация чепсектериниң журналистери тускай чөпшээрел-биле РФ-тиң Президентизиниң парлалга конференциязын чырыдар.
Ш. ЛОПСАН.
Чурукту интернет четкизинден хоолгалаан.
“Шын” №95 2024 чылдың декабрь 11