Тываның Баштыңы Эрзин кожуунга ажыл-агыйжы үнүүшкүн үезинде Булуң-Бажы суурнуң кирер оруунда болгаш төп кудумчузунда септелге ажылдарын хынаан. Көдээ черлерде транспорттуң чедингирин болгаш оруктуң айыыл чок чоруун бедидеринче угланган «Көдээ суурларның комплекстиг хөгжүлдези» күрүне программазының «Көдээ девискээрлерде транспорт инфраструктуразын хөгжүдери» федералдыг төлевилел күүселдези-биле орук участоктары чаарттынып турар.
«Септелге ажылдары ийи чадалыг: ажылдың чартыын бо чылын доозар, а 2026 чылда ону бүрүнү-биле доозар деп планнаттынган. Суурже кирер оруктуң узуну 4,738 км, а төп кудумчунуң узуну – 1,315 км. Амгы үеде черин дескилээр, сай-довурак төгер ажылдар доозулган. Оруктуң 1,6 километрин асфальтылаан» — деп, Владислав Ховалыг хыналда соонда дыңнаткан.
«ДСТ» КХН Булуң-Бажы суурже кирер орукту чаартып турар. Керээ чарган орукчулар бо хүнге чедир белеткел ажылдарын дооскан: сай-довуракты төп, таптай бастырып, кырын дескилеп, суг агар оңгарларны быжыглап, орук кыдыын чаагайжыдып, даш чалдарны салып, ояр оруктарны, суг хоорзаларын, гидроизоляцияны кылган.
Булуң-Бажы суурда Ада-чурт дайынының киржикчизи Галина Тонмитовна Доваадор (Сынаа Кыргыс) аттыг кудумчуда чогуур септелге ажылдарын «ДСТ» КХН чорудуп турар.
Ийи объектиде орук ажылдары федералдыг, республика база тус чер бюджеттериниң кады акшаландырыышкыны-биле кылдынып турар.
«Төлевилелди дооскан соонда, орук айыыл чок болгаш таарымчалыг апаар. Республиканың көдээ суурларында транспорттуң чедингир болгаш айыыл чок чорукту экижидер талазы-биле ажылывысты уламчылаар бис» - деп, Владислав Ховалыг участоктарны хынаан соонда демдеглээн.
ТР-ниң Чазааның парлалга албаны.
