Владислав Ховалыг бо хүннерде Москваның «Лужники» стадионунда болуп турар «FТТ-2025» турисчи шуулганга киришкен. Тываның Баштыңы шуулганның пленарлыг хурал киржикчилеринге республиканың турисчи күчү-шыдалын таныштырган. Шуулган эрге-чагырганың федералдыг болгаш регионалдыг органнарының төлээлерин, Федерация субъектилериниң удуртукчуларын, туризм, отель болгаш дагдан хаак бизнезиниң башкарыкчы сайгарлыкчыларын чыгган.
«Мындыг улуг хемчээлдиг хемчегге киржилге Тываның турисчи арга-шинээн чүгле хөй кижилерге таныштырар эвес, а ажыл-агыйжы кол харылзааларны тургузуп, адырның алыс хөгжүлдезин сайгарып, Россияга болгаш оон дашкаар турисчи рынокка регионну суртаалдаар чаа аргаларны тыварынга арганы бээр» - деп, Тываның Баштыңы форумга киришкен соонда демдеглээн.
Владислав Ховалыг бодунуң илеткелинге сөөлгү ийи чылда күрүне деткимчези-биле регионда чоннуң сонуургап дыштанып баар черлери – Өлүг далай ышкаш шынарлыг Дус-Хөл хөлге, Тываның эң терең арыг хөлү Чагытай хөлге, «Тос-Булак» деп черде ниитизи-биле 20 ажыг чаа чурттаар черлерни тудуп, эштир черлерни дерип, чырыкты киирип, чаагайжытканын демдеглээн.
Чүгле Тывада эвес, а Россияның дыка хөй регионнарында эмнээр шынарлары-биле сурагжаан «Чедер» санаторий-курорт болгаш кадыкшылга комплекизиниң тудуу доозулган. Аңаа чылда эвээш дизе 8 муң кижи дыштанып, эмненир аргалыг апарган. «Туризм болгаш аалчылар хүлээп алыр индустрия» национал төлевилел езугаар Хадың биле Дус-Хөл хөлдерге модульдуг аалчылар бажыңнарының тудуу эгелээнин чугаалаан.
Сөөлгү үш чылда туризм адырында төлевирлиг ачы-дузаның болгаш үндүрүг орулгаларының хемчээли 40 хуу өскен. Чыл санында туристер саны 30 муң кижиге көвүдеп турар.
Тываның Баштыңы регионнуң транспорт инфраструктуразын хөгжүдер айтырыгга аңгы доктааган. Сөөлгү чылдарда Москва, Новосибирск, Красноярск, Улан-Удэ, Иркутск хоорайларже рейстер саны көвүдээн, ооң иштинде субсидиялыг рейстер база бар. Сөөлгү үш чылда Кызылдың аэропортунуң пассажирлер аргыжылгазы үш катап көвүдээн. Чурттар аразының ужудуушкуннарын хандырарынга авиа чүък-пассажир эрттирилге пунктузун ажыткан.
Бо чылдан эгелеп чайгы үеде доктаамал ужар «Кызыл – Улан-Батор – Кызыл» рейсти организастаан. Чаа угланыышкынга чоннуң сонуургалы улуг болганындан келир чылын неделяда ийи катап ужудуп эгелээрин шиитпирлээн.
Чурттар аразының кызыгаарларын таварты эртер транспорт оруунда «Хандагайты – Боршоо» эрттирилге пунктузунуң чаартылгазы, чүгле Тываның эвес, а Сибирьниң өске-даа регионнарының арга-шинээн улам ажыдарынга идигни бээрин Владислав Ховалыг демдеглээн.
Тыва Енисей Сибириниң регионнары-биле кады «Красноярск – Абакан – Хандагайты – Моол – Кыдат» автомобиль оруунуң төлевилелинде идепкейлиг ажылдап турар. «Сибирь дугуржулгазы» ассоциация ону Азияның делегей чергелиг маршруттар четкизинче киирерин деткээн. Бо төлевилелди ам чазактар аразының чогуур комиссияларынга сайгарып көөр кылдыр киирер херек.
Тываның Баштыңы келир чылын Тыва Республика IV делегей чергелиг сарыг шажын шуулганының киржикчилерин болгаш аалчыларын хүлээп алырын сагындырган. Республика – Россияның үндезин буддийжи регионнарының бирээзи, ында чурттакчы чоннуң дөрттүң үш кезии ол шажынга чүдүп чоруур.
Владислав Ховалыг FTT-2025 турисчи девискээрлер шуулганының киржикчилерин келир чылдың августа эртер IV делегей чергелиг буддийжи шуулганынга кээп, республиканың турисчи улуг күчү-шыдалын боттары үнелээр кылдыр чалаан.
FTT-2025 турисчи девискээрлер шуулганы – туризм болгаш инвестиция адырында чазак биле бизнестиң аразында чугаалажылганың эң улуг шөлү-дүр. Дискуссиялар болгаш хуралдар үезинде Россияның турисчи адырының стратегтиг хөгжүлде айтырыглары: эрге-чагырганың федералдыг болгаш регионалдыг органнарындан инвестиция объектилерин база деткимче хемчеглерин таныштырарынче, турисчи девискээрлерниң болгаш курорттарның инфраструктуразынче, адырга инновациялыг чурагай шиитпирлерин хөгжүдеринче, нормативтиг эрге-хоойлу баазазын сайзыраңгайжыдарынче, ачы-дуза болгаш сервистиң шынарын экижидеринче, делегей чергелиг кады ажылдажылга перспективаларынче угланган айтырыгларны сайгарып чугаалашкан.
Бо чылын шуулган 5000 ажыг киржикчилерни: эрге-чагырга төлээлерин, инвесторларны, бизнесменнерни, туризм кластерлериниң удуртукчуларын, отельерлерни, рестораторларны болгаш туроператорларны чыгган. Ажыл-агыйжы программа 50 “төгерик столдарны”, 36 адыр сессияларын, инвестиция төлевилелдериниң таныштырылгаларын болгаш 200 ажыг спикерлерниң илеткелдерин киирген.
ТР-ниң Чазааның парлалга албаны.
