Республикада орук-транспорт озал-ондактарының саны эвээжевээн. Аңаа холбаштыр Тыва Республиканың Баштыңы Владислав Ховалыг бодунуң арынынга мынча деп бижээн:
“Бо чылын орук озал-ондактарынга 53 кижини оскунган бис, 380 кижи бертинген. Оларның чамдыызы бүгү назынында бертик-межел арткан. Оруктарга айыыл чок чорукту хандырары-биле улуг хемчээлдиг чаартылгалар калбаа-биле негеттинер.
Тываның Орук яамызынга эң хөй озал-ондактар болуп турар участоктарны тодарадырын даастым. Оларның септелгезинге азы эде чаартылгазынга акша-хөреңгилерни дилээр апаар бис. Федералдыг Чазактан дуза дилээр ужурга таваржып тур бис. Регионнуң Өөредилге яамызы бисте бар 23 автошколаның ажылын таптыг сайгарып хынаар ужурлуг.
Орук шимчээшкининиң айыыл чок чоруунуң күрүне инспекциязы-биле катай транспорт башкарылгазынга шылгалдалар дугайында чугаалаштывыс. Шылгалдаларны дужаарының ээлчег- оочуру дүрген шимчээри-биле шылгакчыларның санын көвүдедир чадавас бис. Доскуулчуларның санын көвүдедир болуп Иштики херектер яамызы-биле дугуруштувус. Кадрлар чедишпейн турарының ужун орук-доскуул албанының катап тургустунган черлери кол нуруузунда ээн. Тываның иштики херектер сайыды С.Н. Кондрашов кадрлар айтырыын божуу-дүрген шиитпирлээри-биле күжениишкиннерни үндүрүп турар дээрзин билир мен.
Биске башкарылганың культуразы тоң чугула. Ону орук шимчээшкининиң киржикчи бүрүзү медереп билген турар ужурлуг. Пятница, субботаларда, оон туржук ажыл хүннеринде куда-дой, байыр-найыр эрттирген банкет залдарының чанында “өрттеп” каан автомобильдерниң хөйүн. Амыдыралдан алырга, куда-дой соонда, хөлге-чычааннарның ээлериниң чамдыызы эзирик руль артынга олурупкан болур. Дөргүл-төрелин болгаш өңнүктерин бажың-балгадынга чедирер дээш мындыг аажылал чүнүң-биле төнүп болурул, байыр-найыр хай-халап-биле доозулза канчаарыл? Ат-сураглыг хөй-ниитижилерни, билдингир блогерлерни, бо чидиг айтырыгга тоомчалыг кижи бүрүзүн ооң шиитпирлээшкининге киржиринче, санал-оналын бээринче кыйгырдым”.
А. ХЕРТЕК белеткээн.
"Шын" №64, 2023 чылдың август 30