Очулга төвү «Дхарма-Дарыма»
Угаадыглыг чугаа
Шаг шаандан бээр хөлге языты-мелегей чурттап чораан чүве-дир. Кезек када ол эки-ле чурттап турган, ындыг-даа болза бир-ле катап изиг кааң чайын хөл кадып калган. Хөөкүй языты-мелегей ырмасынчыг бергедеп турда, хөл чанынга ийи кас хонупкан.
— Бергедеп турарыңны көрүп тур бис — деп, кастарның бирээзи чугаалаан, — сеңээ дузалажырын күзеп тур бис. Чүгле чүнү канчаптаалы?
— Дуу ол узун чиңге ыяшты ийи ужундан тудуп алыңар, ынчан мен оон туттунуптайн. Ыяштан туттунуптарымга-ла, мени кожа чыдар хөлге чедирип каар силер.
— Эки-дир — деп, кастар харыылааш, — чүгле орукка ыыттавас бооп-тур сен ийин. Оон башка куду баткаш, өлүр дүжер сен!
Шак ынчаар кылганнар иргин. Кастар языты-мелегейниң чедискээни хөлге мырыңай чоокшулай берген турда, адаанда суур көстүп кээп-тир. Улус көрбээн чүвезин көрүп кааш, элдепсинип алгырып эгелээн:
— Көрүңер даан, дуу ында ийи кас языты-мелегейни көдүрүп алган ужуп чорлар. Кандыг кончуг тывынгыр кастар боор!
Языты-мелегейниң сагыжын ол сөстер хөлзедипкен. Канчап ындыг чүвел, чиңге ыяшты ап алырын кастарга ол чугаалаан-на болгай. Чүгле ону улуска дыңнадыр дээш, аксын ажыдыптарга, ол-ла дораан боду салдынгаш, куду ужуп баткаш, өлүр дүшкен.
З.Б. САМДАН очулдурган.
«Сарыг шажынның угаадыглыг чугаалары» деп номдан алган.
Чурукту интернеттен хоолгалаан.
«Шын» №21 2025 чылдың июнь 5

