Тываның биче суднолар талазы-биле харыылаар күрүне инспекторлары Кызыл хоорайның чурттакчыларынга Крещение байырлалында сугже кирер черни тодараткан. Ол чаңчыл ёзугаар чүгле Улуг-Хемниң Вавилин ээтпээниң девискээринде Кызылдан 3 км ыракта Кызыл – Кара-Хаак оруунуң дужунга болур. Оон өске черлерде ёзулалды организаставайн турар. Ында доштуң кылыны 65 см, сугнуң ханызы 1 метр 70 см, агым чок, турум чер. Чоннуң айыыл чок чоруун хандырары-биле эжиндириишкин кылыр черге ОБЯ ажылдакчылары хондур дежурныйлаар.
Бөгүн Тываның православ хүрээлеринде чаңчылчаан мөргүлдер эгелээн. Эртенгиниң 9 шактан эгелеп православ хүрээлерниң башкылары тускай ёзулалдарны кылыр. Ооң соонда сугнуң бир дугаар ыдыктаашкыны болур. Дүн ортузунда Кызылдың Вавилин ээтпээнде күзелдиг кижилерниң сугже кирер чери ыдыкталы бээр.
Январь 19-та эртенгиниң 08:40-де Бурганның байырлыг ёзулалы эгелээр. Ооң соонда сугнуң ийи дугаар ыдыктаашкыны болур. Ол ыдыктаан сугну хүрээлерден чалап алыр. Байырлалче четтикпейн барган улус январь 20-де база ыдыктаан сугну хүрээлерден чалап ап болур.
2024 чылдың январь 18, 19-та болур Крещение эжиндириишкининче баар 4 автобусту 4 аңгы доктаамдан кежээкиниң 22:00 шактан эртенгиниң 05:00 шакка чедир организастаан. Хөй-ниити транспортунуң ажылдаар чуруму-биле ТР-ниң Националдар херектериниң талазы-биле агентилелдиң болгаш Кызыл хоорайның чагыргазының албан ёзугаар сайтызындан көрүп ап болур:
“ТЭЦ” доктаамындан эштир черге чедир: 22:00, 00:30, 03:00 шактарда.
Хоорайже дедир 23:30, 02:00, 04:30 шактарда автобустар үнер.
“Южный” доктаамындан 22:00, 01:00, 04:00 шактарда үнер.
Хоорайже дедир 23:50, 03:00, 05:00 шактарда келир.
Зверофермадан: 22:00, 00:00, 02:30 шактарда автобустар үнер.
Хоорайже: 23:00, 01:30, 03:40 шактарда автобустар үнер.
“Спутник” микрорайонундан: 23:00, 01:00, 03:30 шактарда автобустар үнер.
Хоорайже: 00:00, 02:30, 04:50 шактарда автобустар үнер.
Январь айның ортузунда православ чүдүлгениң кижилери Крещение байырлалын демдеглеп эрттирер. Ойган дошче кирер ёзу-чаңчылды бурун шагдан тура сагып келген.
Тыва Республиканың хүндүлүг чурттакчы чону, ойган дошче кирери организме улуг стресс болур. ТР-ниң Кадык камгалал яамызы ыдыктаан сугже кирер кижилерге сүмелерни белеткээн. Сугже кирер мурнунда кадыыңар аайы-биле эмчиниң хоруп каан чүүлдериниң бар-чогун тодарадып алыңар. Чүрек-дамыр системазында, тыныш органнарында, ижин-баарында, сыңыйында аарыгларлыг, думчуунда ыжыктыг, иштики бестеринде ыжыктарлыг кижилерге доштуг сугже кирери хоруглуг.
Оваарымчалыг болуңар, айыыл чогунуң шупту хемчеглерин сагыңар.