Февраль 14-те бүгү делегейге ынакшыл хүнүн байырлаар. Ооң тывылганының дугайында каш аңгы тоолчургу чугаалар бар. Оларның бирээзин “Шынның” номчукчулары-биле үлежир-дир бис.
Шаанда Римге Клавдий II деп кончуг дайынзырак, каржы хаан чораан. Ол үеде чер-чурт дээш эжелекчи дайыннар үзүктел чокка удаа-дараа болуп турганы-биле шериг күжү чедишпес, берге үелер турган.
Клавдий II хаан ук айтырыгны шиитпирлээриниң аргаларын өөренип көргеш, эр хиндиктиг кижилерниң өгленирин хоруур доктаалды үндүрген. Олар чүгле чуртун камгалаар, дайыннарга тиилеп чурттаар ужурлуг деп, ол санаар чораан.
Ынчалза-даа ынакшылга кым-даа, чүү-даа моондак болуп шыдавас дээр болгай. Римниң аныяк оолдары хаанга билдиртпезин кызыдып, аңгы-аңгы аргалар дузазы-биле душтуктарынга ужуражып турганнар. А Ыдыктыг Валентин оларны бүдүү өглээр турган. Ооң ачызында хөй-ле ынакшааннар өг-бүле тудуп, бичии-даа бол, кады аас-кежиктиг чурттаар аргалыг турган.
Валентинниң дугайында Клавдий хаан дыңнап каан. Ооң үндүрген доктаалынга удур чоруу дээш ону чок кылыр дужаалды берген.
Февраль 14-те (496 чылда) Ыдыктыг Валентин ынакшааннар дээш амы-тынындан чарылган. Ооң ынакшаан чүректерни каттыштырар сорулгалыг кылып чораан буянныг үүле-херээнге тураскааткан чараш байырлал шак мынчаар төөгүде тывылган. Февраль 14-түң хүнүн бүдүн делегейде ынакшааннарның хүнү кылдыр демдеглеп турары болза, Ыдыктыг Валентинниң ынакшыл болгаш өг-бүле база ие-чаш дээш амы-тынындан чарылганы хилис болбаанының демдээ.
Ыдыктыг Валентин хүнү-биле!
Ынак болуңар!
Ынаа болуңар!