Эргим солунум «Шын» 100 чыл чеде бергенин билбейн барып-тыр мен. Ооң соонда-ла бажымга хөй бодалдар кирип, «Шын» солунга бердингенимни, ук солунга чүнү бижип чораанымны сактып келдим.
Школачы чорааш-ла, солунну улуг сонуургал-биле номчуп чораан мен. Оон улаштыр улуг эвес материалдар бижип, шору бижикчи апарган мен. Улай бижип чорааш, опыт-дуржулга алгаш, мырыңай кроссвордтар чогааткаш, оларны чорудуп эгелээн мен.
1976 чылда мээң чогааткан кроссвордтарым дээш «Шын» солуннуң 3-кү шаңналын тыпсырга, өөрээнимден улам сорук кирип, бичии шүлүктер база бижип эгелээн мен. Ол үеде кроссвордтарны дыштаныр хүннүң арнынга дыка үндүрер турган. Ам эскерип турарымга, көзүлбестеп каап-тыр.
Колдуу-ла культура темаларынга бижип чораан мен. «Чадаган» агитбригадазы, Хандагайтының уруглар уран чүүл школазы, Культура ажылдакчыларының ажыл-ижи дээш оон-даа хөй. Бижээн чүүлдерим эки болганы-ла ол боор, «Шын» солуннуң хүндүлел бижии-биле шаңнады.
Аныяамда политика-даа сонуургавайн чораан мен. “Шынга” үнүп турган «Бөмбүрзектиң судалын» номчааш, политикаже база кирдим. Элээн каш шүлүктерни бижип, диспуттарга киржип келдим.
Солуннуң кээрин четтикпейн манаар кижи мен, ам солун чагыдып алгаш, почтаже бодум барып алыр мен, чүге дизе бистиң суурда почтальон деп ажылдакчы чок. Бодаарымга, улустуң солун номчууру-даа шоолуг эвес апарган хевирлиг, чылдагааны үениң сайзыралында-ла боор, база кожууннар боттары солуннарлыг апарган, чижээ, бистиң кожуун- да – «Өвүр черде» солун.
Амгы үеде «Шын» солунга спорт болгаш культура темаларынга кедергей солун чүүлдерни парлап турлар. Өөрүвес аргажок. Солуннуң деткимчези-биле мээң ырларым-даа үнүп кээр-дир, ооң-на девии боор «Бора-Шайым» биле «Өвүрнүң вальзы» деп ийи ырлар чыындызын чырыкче үндүрүп алдым. Четтирдим, эргим солунум!
Красноярск хоорайга уйнуктарым чанынга олургаш, сагыжымда бир-ле чүве четпес. Ол дээрге «Шын» солунну номчуваанымда болду.
Ынчангаш ынак солунумнуң ажылдакчыларынга улуг байырлал-биле изиг байырым чедирип, «Шын» кажан-даа шынчы болуп артып каарын күзедим!
Эң-не эки күзээшкиннер-биле,
Болат-оол ХОМУШКУ.
“Шын” №32 2025 чылдың август 21