Февраль 11-де Тыва Республиканың Культура яамызы биле “Тыва” КТРК кады ажылдажылганың керээзин чарган. Байырлыг хемчегге республиканың бүгү культура албан черлериниң удуртукчулары, хоочуннары база тыва радио, телевидениениң хоочуннары киришкен.
1966 чылда Тыва АССР-ниң Күрүнениң телерадиокомпаниязы тургустунуп турда, ооң-биле чергелештир ол-ла оран-савага Тываның симфониктиг оркестри тургустунган. Бо хүнде оркестр катап бодунуң төрээн студиязынче эглип, 20 ажыг чыл дургузунда ажыглал чок турган хөгжүм бижидер студияны ам-на диргизип, симфониктиг оркестр бодунуң репетицияларын профессионал студиязынга чорудуп эгелээр дээнин хөгжүмчүлер-даа, культураның көскү ажылдакчылары, хоочуннар-даа шупту төөгүлүг болуушкун деп үнелеп, улуг өөрүшкү-биле деткээннер.
2026 чылда В. Тока аттыг Тываның күрүнениң симфониктиг оркестри биле тыва телевидение тургустунганындан бээр 60, тыва радионуң 90 чыл оюн демдеглээринге белеткенип турар. Тываның культура сайыды Виктор Чигжит дугуржулгага ат салган соонда, чыылганнарга байыр чедиргеш, шак ол студияга симфониктиг оркестрден аңгыда, республиканың өске-даа профессионал коллективтери база аңаа боттарының хөгжүм аялгаларын, ырларын бижидер аргалыг болурун дыңнаткан.
“Тыва” КТРК-ның директору Оюмаа Көшкендей шак бо улуг ажылды чорудар дугайында чугаа тыва телевидениениң хоочуннары-биле ужуражылга үезинде эгелээнин дыңнаткан. Телевидениениң хоочуннары ажылдап турган үезинде, бичии-ле чапсар аразында, ол студияга симфониктиг оркестрниң репетицияларын дыңнап кээп турганын сагындырган. Ынчангаш телевидение дээрге чүгле медээлер, дамчыдылгалар эвес, а культурлуг өнчүнүң кадагалалының чугула кезээ, ол талазы-биле ажылды ам-даа уламчылаары чугула деп ол демдеглээн.
Кады ажылдажылганың керээзин чарган байырлыг хемчегге культураның хоочуну РФ-тиң болгаш ТР-ниң культуразының алдарлыг ажылдакчызы Виктор Нагорный республиканың профессионал коллективтеринге үн бижидеринге шак ындыг эки шынарлыг хөгжүм студиязы дыка хереглелдиг турганын, келир салгалдарга культурлуг өнчүнү дамчыдып бээринге ужур-дузалыг улуг ажылдың эгези катап салдынганынга өөрүп турарын демдеглээн. Тыва телевидениеге режиссёрлап ажылдап чораан бодунуң үезинде Тываның сураглыг композиторларының бижээн аялгалары симфониктиг оркестрниң үделгези-биле эң баштай бо хөгжүм студиязынга дыңналып кээп турганын, ол оркестрниң дириг хөгжүмүн кожуун, суурларже гастрольдап чораан үелеринде чон кайгамчыктыг өөрүшкү-биле хүлээп дыңнаар турганын Светлана Мунзук сагынган.
Кады ажылдажылганың керээзинге ат салдынган хүнден эгелээш, В. Тока аттыг Тываның симфониктиг оркестри төрээн студиязынга чараш оюн-көргүзүүн чыылганнарга бараалгаткан. Ооң үделгези-биле В. Халилов аттыг Тываның күрүне филармониязының ат-сураглыг болгаш аныяк ыраажылары А. Чыргал-оолдуң “Хүннүг Тывам” деп ырызын ырлай бээрге, шынап-ла, чылдар дургузунда ээн турган студия ам-на чырып, ыр-шоор чаңгыланып, классиктиг дириг хөгжүмнүң онзагайы, чаражы аңаа дыңналып келгенин чыылганнар магадаан. Ылаңгыя аныяк хөгжүмчүлер, ыраажылар ол профессионал студияга ойнаарга, ырлаарга-даа, кандыг-даа үн улгаттырар микрофон чокта шупту аялгалар тода, чараш дыңналыр болганын дораан эскергеннер.
Ийи таланың ат салган керээзи ёзугаар ТР-ниң Культура яамызы үн бижидер профессионал студияның дерилгезин чаартып хандырарынга дузалаар болган. Оон аңгыда ийи тала “Тыва” КТРК-ның “алдын шыгжамырында” видео болгаш аудио материалдарны ажыглап тургаш, солун төлевилелдерни боттандырар сорулганы салган.
Бистиң корр.
Чуруктарны интернеттен алган.
“Шын” №6 2026 чылдың февраль 19
