Май 25-те Россияның камгалал сайыдының оралакчызы генерал-полковник Александр Фомин май 16-да Стамбулга "1000 кижиге 1000 кижи" деп саналга солчулгазының дугуржулгазы долузу-биле күүсеттингенин дыңнаткан, ооң түңнелинде украин туттуруушкундан 880 российжи шериглер болгаш 120 тайбың чурттакчылар эглип чанып келген. Оларның аразында бистиң дөрт чаңгыс чер чурттугларывыс: Роберт Самбуджук, Арбай-оол Хомушку, Андриян Шивит-оол база Буян Ховалыг бар.
Александр Фомин май 25-те, Киевтиң контролюнда девискээрден 303 российжи шериглерниң ам-даа ээп келирин дыңнаткан. Оларга херек бүгү дузаны көргүзүп турар. Ооң орнунга Украинаның Чепсектиг күштериниң туттурган 303 дайынчызын дамчыткан.
«Амгы үеде Россияның шериг албанныглары Беларусь Республиканың девискээринде, Россияже чанарынга белеткенип турар — деп, ол чугаалаан. – Ынчалдыр үш хонуктуң дургузунда, май 23, 24 база 25 хүннеринде 880 орус шериг албанныглар база 120 тайбың хамаатылар чанып келген. Россияның саналдааны езугаар туттурганнарның улуг хемчээлдиг солчулгазы– украин кризисти тайбың арга-биле шиитпирлээринге таарымчалыг байдалды тургузарынга идегеп турар».
Фомин Белоруссия Республиканың эрге-чагыргазынга бүгү талалыг дузазы болгаш деткимчези дээш өөрүп четтиргенин аңгы илереткен.
Туттурган шериглер-биле кады украин шериглерниң эжелеп алганы Курск облазының тайбың чурттакчылары база чанып келген. Россияның Камгалал яамызының эмнелге албан черлеринге российжи шериглер база тайбың чурттакчылар реабилитацияны база эмнээшкинни алыр. Дайзынның девискээринде арткан чаңгыс чер чурттугларывысты эгидер талазы-биле ажылдар уламчылап турар. Россияның Камгалал яамызының чогуур албан черлериниң специалистери айтырыгларны шиитпирлээри-биле хаара туттунган.
Бистиң корр.
Чурукту ТР-ниң Чазааның парлалга албанындан алган.
“Шын” №20 2025 чылдың май 29
