«Көдээ черниң башкызы» федералдыг программаның деткимчези-биле 13 башкы Тываның школаларынга ажылдаары-биле ТР-ниң Өөредилге яамызынга үш талалыг керээни эрткен неделяда чарган. Тываның 13 школазының директорлары специалист башкылар-биле кады керээге атты салыр дээш, найысылалга келген.
Математика, орус дыл, физика, даштыкы дыл, биология эртемнериниң болгаш эге класс башкылары Тываның көдээ школаларынче аъттаныпкан. 2024 чылда Бай-Тал, Берт-Даг, Ак-Тал, Нарын, Бижиктиг-Хая, Шамбалыг, Дерзиг-Аксы, Бажың-Алаак, Баян-Кол, Ак-Чыраа, Кызыл-Тайга, Межегей болгаш Доора-Хем ортумак школаларында башкылар чедишпезиниң дугайында дилег кирген турган.
ТР-ниң өөредилге сайыдының хүлээлгезин күүседип турар Алена Самбала башкы коллегаларының ажыл-ижинге чедиишкиннерни күзээн.
2024 чылда «Көдээ черниң башкызы» программага киржири-биле ниитизи-биле 101 аңгы-аңгы эртемниң башкылары билдириишкинни онлайн хевирге киирген турган. Оларның 43-ү документилерин четчелеп эккелген. Эскперттерниң түңнеп үндүргени-биле 13 башкы шылгарааш, «Көдээ черниң башкызы» программага киржип, 1 сая рубль түңнүг төлевир акшазын алыр болган.
Ниитизи-биле 2020 чылдан тура «Көдээ черниң башкызы» федералдыг программаның деткимчези-биле 49 башкы Тываның школаларында ажылдап турар.
Бистиң корр.
“Шын” №67 2024 чылдың сентябрь 4
