Октябрь 15-те 20 тонна чүъктүг фура Донбассче аъттаныпкан. Ук чүъкте чылыг идик-хеп, аъш-чем болгаш дайын шөлүнге ажыглаар янзы-бүрү тускай дериг-херекселдерни чүдүрүпкен.
Улусчу фронтунуң Кызыл хоорайда штавынга чоннуң чыгганы гуманитарлыг дузазын Тываның кадет корпузундан болгаш өске-даа ортумак өөредилге черлеринден келген волонтёрлар идепкейлии-биле чүдүреринге дузалашкан.
«ТР-ниң Баштыңы Владислав Ховалыгның даалгазы-биле бөгүн чүък чүдүрер улуг фурага 20 тонна чүъктү Кызыл хоорайдан Донбассче аъткарып турарывыс бо. Тываның Чазаа чүък сөөртүр автомашинаның кывар-чаар чүүлү дээн ышкаш организастыг айтырыгларын долузу-биле харыылаан. Бо чүъктүң чедер чери Донецк хоорай. Чүгле дайынчыларга эвес, а тус черниң чурттакчыларынга база гуманитарлыг дузаны чорудуп турар бис. Бо чорудуп турар чүъгүвүс Тываның буянныг чүректиг, дузааргак чурттакчыларының ачызында чыылган деп болур» – деп, «Содействие» фондузунуң директору Артыш Иргит дыңнатты.
«Улусчу фронтунуң «Бүгү чүүлдү тиилелгеже!» деп төлевилелиниң болгаш ТР-ниң Баштыңы Владислав Ховалыгның база ТР-ниң Дээди Хуралының Даргазы Каң-оол Давааның деткимчези-биле гуманитарлыг дузаның ээлчеглиг чүъгүн чүдүрүп турарывыс бо. Улусчу фронтунуң төлээзи болгаш коллегам Буян Доңгак-биле кады бо чүъктү чедер черинге чедир үдеп чедирер бис. Чоокта чаа чорутканывыс 9 автомашинавысты Донда Ростовтан уткааш, Донбасска чедирер хүлээлгевис ол» – деп, ТР-ниң Дээди Хуралының депутады Эрес Хуурак чугаалады.
Бир эвес агаар-бойдус аяс, орук эки болур болза, орукка 7–8 хире хонук үнер. Ниитизи-биле чүъктүг автомашина 5 муң ажыг километр орукту эртер дээрзин депутат немей тайылбырлады. Эрес Хуурак бо удаада 12 дугаар чүък үдеп чорууру ол.
«Бөгүн кады өөренип турар эштерим-биле ТШО-же чорудар чүъктү чүдүржүптер дээш, чеди кижи келдивис. Ооң мурнунда база чүък чүдүржүр ажылдарга киржип турдувус» – деп, Тываның кадет корпузунуң сургуулу Денис Хертек чугаалады.
Тускай шериг операциязында киржип турар чаңгыс чер чурттугларывыска удавас Тывадан чүък чеде бээр. Волонтёрларның чүдүрүп турар чүъгүнүң аразында чүнү чок дээр. Адрестиг-даа шоодайлар бар, чамдык саваларда саржаглааш, чигирлээш, ааржылап каан тыва далган-даа, аргаан уктар, хөйлеңнер-даа бар. Өң-чүзүнүн күскү үеге чүүлдештир аргаан шывыглар, чылыг идик-хеп болгаш хеңмелээн эът дээш шупту бар. Чоннуң чыгган чүъгү чедер черинге онча-менди четкеш, тиилелгеже бурунгаар базымнар кылыр күштү чаңгыс чер чурттугларывыска бээр болзун!
Айдың ОНДАР.
Буян ООРЖАКТЫҢ тырттырган чуруктары.
«Шын» №79 2024 чылдың октябрь 16
