Бо хүннерде республикада орук шимчээшкининиң дүрүмнерин хажытканын тырттырар автоматтыг чурук-видео бижидер 85 комплексти идепкейлиг ажыглап турар. Оларның хөй кезии, азы 39 комплекс, Кызылдың муниципалдыг оруктарында турар.
Регионалдыг автооруктарда база Р-257 «Енисей» федералдыг автоорукта 29 комплексти салган. Арткан дериг-херекселдерни Кызыл биле Каа-Хем кожууннарның муниципалдыг оруктарында салып, планныг орук септелге ажылдары чоруп турар девискээрлерде кошкан.
Бо чылын чурук-видео бижидер чеди чаа комплексти салган. Оларның дөртүн хөй озал-ондактар болуп турар орук участоктарында тургускан. Сарыг-Сеп суурда, ол ышкаш Бии-Хем кожууннуң Сушь биле Билелиг суурлар чоогунда Р-257 федералдыг автоорукта үш чаа системаны немей салган.
2025 чылдың январь 1-ден орук шимчээшкининиң дүрүмнерин хажытканы дээш, фото-видео бижидер системаларның ажылдаарын чурумчудар чаа дүрүмнер Россияда күшче кирген. Ам камералар чүгле дүрген халдып, кызыл чырыкты эрте бергенин эвес, а айыыл чок курун шарып албааны, тургузуп болбас черлерге, ооң иштинде чадаг кижилер кежер оруктарга доктааганын, ол ышкаш чадаг кижилерге орук чайлап бербээн чурум хажыдыышкыннарын бижип демдеглеп турар.
Регионнуң орук шимчээшкинин башкарар төвүнүң дыңнатканы-биле алырга, бо чылдың эгезинден бээр республикада автоматтыг фото-видео бижидер комплекстиң дыңнадыынга даянып, чолаачыларга онааштыр 263185 административтиг чурум хажыдыышкыннарының доктаалдарын үндүрген. Эрткен чылдың ол үезинге деңнээрге, ол 25 хуу хөй. Чурум хажыдыкчыларынга онааган торгаалдарның ниити түңү 300 сая рубль ажа берген.
Бистиң корр.
Чурукту интернет четкизинден хоолгалаан.
“Шын” №48 2025 чылдың декабрь 11