2023 чылда Тывада үш көдээ библиотеканы чаартыр.

Россия Федерациязының Культура яамызы 2023 чылда библиотекаларын чаартыр конкурс шилилдезин эрткен РФ-тиң субъектилерин чарлаан.
Тыва Республикадан Барыын-Хемчик кожууннуң төпчүткен кожуун библиотеказы, Мөнгүн-Тайга кожууннуң Мугур-Аксы биле Бай-Тайга кожууннуң Кызыл-Даг суурларының библиотекалары конкурс тиилекчилериниң санынче кирген.
Келир чылын «Культура» национал төлевилели-биле бүгү чуртта 218 муниципалдыг библиотекаларны, ооң санында 130 биче болгаш 88 төп библиотекаларны чаартыр.
«Культура» национал төлевилелдиң «Культурлуг хүрээлел» федералдыг төлевилелди боттандырган 2019- 2021 чылдарда республикада амгы үениң модельдиг чеди библиотеказы ажыттынган. Бо чылын республикада беш библиотека бүрүнү-биле чаартынган. Чаа-Хөл биле Кызыл кожууннарда база Кызыл хоорайда чаартынган үш библиотека номчукчуларга эжиин ажыткан Бай-Тайга биле Чеди-Хөл кожууннарда төпчүткен кожуун библиотекалары октябрьда ажыттынар.
Библиотекаларның чаартылгазынче федералдыг бюджеттен 80 миллион рубльди, регионуундан - 8 чартык млн рубльди үндүрген.

ТР-ниң Чазааның парлалга албанының медээзи-биле