Бо чылын Тывада «Сорунза» губернатор төлевилели-биле Бай-Тайга кожууннуң Ээр-Хавак база Улуг-Хем кожууннуң Торгалыг суурларда ийи көдээ культура бажыңнары туттунуп турар. «Сорунза» төлевилел республиканың эвээш чурттакчылыг черлеринде культура инфраструктуразын хөгжүдеринче угланган.
240 дөрбелчин метрден хөй ниити шөлдүг, 120 олуттуг, библиотека болгаш көрүкчүлерге залдыг амгы үениң чаа көдээ бажыңнары суур чонунуң саналдары-биле туттунар. Тус черниң чагыргаларының кады акшаландырыышкыны-биле республика бюджединден үндүрген акша-хөреңгиге тудуг ажылдарын тус черниң специалистери организастап турар. Тудуг шөлдеринде тус черниң чурттакчылары-биле культура ажылдакчылары демнежип ажылдап турар. Бо чылын ийи тудуг төлевилелинге ниити түңү 35 млн 400 муң рубль акшаландырыышкынны тускайлаан. Республика бюджединден 30 млн рубльди үндүрген болза, арткан 5 млн 400 муңну муниципалдыг тургузуглар хандырар.
Бай-Тайга кожууннуң Ээр-Хавак суурда тудугнуң таваан салып, кудуун казып, кара-шалазын кудуп белеткээн. Ханаларын тургузуп, өрээлдерин аңгылап салган, баганаларын быжыглаан. Бо хүнде сейсмиктиг куржагны быжыглаар болгаш тургузар ажылдарже кирген.
Суурнуң эрги культура бажыңы айыылдыг байдалда келген деп түңнээн. Тус черниң чурттакчылары республика Баштыңы Владислав Ховалыгга ооң дугайында тайылбырлап чугаалаарга, чаа Культура бажыңын тудуп бээр дээн дилегни «Сорунза» программазынче киирип деткээн.
Торгалыг суурда чаа тудугнуң таваа доозулган. Ханаларын тудуп үндүрген, кыдыкы баганалар кудар ажылдар чоруп турар. Ыяш шала чадар ооргаларны быжыглап дооскан.
2021 чылда эгелээн «Сорунза» губернатор төлевилели-биле республиканың муниципалдыг тургузугларында 15 культура объектилерин туткан. Ол чүүл көдээ чоннуң культурлуг хемчеглерже киржилгезин көвүдедип, дыштанылгазының шынарын экижиткен. Губернатор төлевилелиниң ачызында Тывада эргижирээн көдээ культура болгаш дыштанылга черлериниң үлүү эвээжээн. Эрткен чылын төлевилел күүселдези-биле Чеди-Хөл кожууннуң Хову-Аксы суурга библиотека тудар эгелээшкин бир дугаар боттанганын сагындыраал.
Бистиң корр.
Чуруктарны Культура яамызындан алган.
“Шын” № 30 2025 чылдың август 7
