Регионнуң Тудуг яамызының август 4-те дыңнадыы-биле алырга, Тывада 653 өг-бүле чылда 2 хуу чиигелделиг ипотека чээлизин алыр керээлерни чедиишкинниг чарып, чурттаар оран-савазының ээлери апарган. 2025 чылдың март эгезинде катап эгелээн программа-биле республиканың чурттакчылары банкыларже 4118 билдириишкинни киирген, оларның 2012-зи чөпшээрелди алган.
«Өг-бүле» национал төлевилел шугуму-биле ажы-төлдүг өг-бүлелерни деткиир хемчеглерниң бирээзи болур чиигелделиг ипотека чээлизиниң программазы Тываның Баштыңының болгаш республика Чазааның күжениишкиннери-биле, ол ышкаш Россияның Президентизи Владимир Путинниң деткимчези-биле ажылын регионда уламчылап турар. Ооң катап эгелээ- ни регионга чурттаар оран-сава тудуун хөгжүдер арганы берген. Владислав Ховалыгның Дээди Хуралга 2025 чылдың Айыткалында чаа чуртталга бажыңнарын көвүдедири-биле республика бүгү аргаларны ажыглап, таарымчалыг байдалдарны тургузар дугайында демдеглээнин сагындыраал.
2 хуу чиигелделиг «Өг-бүле ипотеказынга» 6 хар чедир уруглуг, 18 харга чедир инвалид уруглуг өг-бүлелер база 18 харга чедир ийи азы оон хөй ажы-төлдүг өг-бүлелер киржип болур. Программа киржикчизи тудуг черинден чаа чуртталга бажыңын садып ап болур, чижээ, Кызылда садып турар 1000 ажыг квартиралардан ону шилип ап болур. Ол ышкаш чөпшээрелдиг тудуг организациязы-биле керээ ёзугаар бодунуң бажыңын туттуруп ап база болур.
Чээлиниң эң улуг хемчээ- ли – 6 сая рубль. Баштайгы төлевирниң түңү садып алыр оран-савазының өртээниң 20 хуузундан эвээжевес. Баштайгы дадывырже федералдыг бюджеттен алган акша-хөреңгини (ооң иштинде ие капиталының акша-хөреңгизин), ол ышкаш Россия Федерациязының субъектизиниң бюджеттеринден, тус чер бюджеттеринден азы ажыл берикчизи организациядан саң-хөө дузазын ажыглап болур.
ДОМ.РФ банкының сайтызынче, Домкликтиң онлайн азы Ажаалга банкызының офистеринге чээли алырынче билдириишкинни киирип болур. Өг-бүлениң чиигелделиг ипотека программазы-биле тудуг черинден бажың садып алырының дугайында тодаргай сүмелерни Кызылда Эки турачылар кудумчузунуң 18 дугаарлыг бажыңында (1 дугаар каът) «Мээң бизнезим» төптен ап болур. Специалистер дыштаныр хүн чокка, хүннүң-не ажылдап турар.
Шагаан-Арыг, Чадаана, Туран, Ак-Довурак хоорайлардан өг-бүлелер ийиги рыноктан бажыңнарны таарымчалыг негелделер-биле садып ап болур. Өг-бүле ипотеказы-биле садар бажыңнар 20 чыл четпээн болгаш аварийлиг деп санатпаан болур ужурлуг.
Ажы-төлдүг өг-бүлелерге чылда 2 болгаш 6 хуулуг чуртталга чээлизиниң бо ийи программазы 2025 чылдың декабрь 31-ге чедир ажылдаар. Бо чылын 1000 квартираны 2 хуу чиигелделиг ипотека-биле садары планда көрдүнген.
А. МОНГУШ
Буян ООРЖАКТЫҢ тырттырган чуруктары.
“Шын” № 30 2025 чылдың август 7
