Өөредилге яамызы Тываның Көдээ ажыл-агый болгаш аъш-чем яамызы-биле кады көдээ ажыл-агыйынга мергежилдиг кадрларны белеткээринче угланган «Технологтуг хандырылга болгаш аъш-чемниң айыыл чок чоруу» национал төлевилелдиң «Агроүлетпүр комплекизинде кадрлар» федералдыг төлевилелди күүседип, республиканың ниити өөредилге албан черлеринге 24 агрокласстарны бо чылын ажыдары планнаттынган.
Амгы үеде регионалдыг яамыларның төлээлеринден, көдээ ажыл-агый технологиязының адырында эксперттерден тургустунган ведомстволар аразының ажылчын бөлүүн тургузар организастыг ажылдар чоруп турар. Ажылчын бөлүк көдээ ажыл-агый класстарын ажыдар черлерни шилип алырының негелделерин тургузуп, үнелел хемчеглерин эрттирерин база чаа өөредилге шөлдерин ажыдарының бүгү ажыл-чорудулгазын дүүштүрүп турар.
Оон аңгыда башкы кадрларны белеткээриниң хемчеглерин база чорудар. Планнарда 40 башкының билиг-мергежилин бедидер болгаш эде белеткээр курстар бар. Төлевилелге башкыларның киржир күзелин күштелдирери-биле деткимче төлевирлерни бээр.
«Тыва Республиканың көдээ ажыл-агыйының онзагайларын барымдаалап, күш-ажыл рыногунуң амгы негелделеринге дүгжүп турар агротехнологтуг класстарга тодаргай өөредилге программаларын ажылдап кылыры планнаттынган. Россияның Көдээ ажыл-агый яамызының негелделери езугаар амгы үениң дериг-херекселдерин болгаш технологияларын ажыглаарын хандырып, ол ышкаш агроүлетпүр комплекизиниң башкарыкчы бүдүрүлгелеринге сургуулдар стажировкаларын организастаар ужурлуг бис» - деп, көдээ ажыл-агый болгаш аъш-чем сайыды Юрий Оруспай тайылбырлаан.
Россияның Көдээ ажыл-агый яамызы республика бюджединден кады акшаландырыышкын-биле кады, ол ышкаш инвесторларны хаара тутпушаан федералдыг төлевилел хемчеглериниң күүселдезинче субсидияларны тускайлаар. Агротехнологтуг класстарның материал-техниктиг баазазын тургузарынче чарыгдалдарны кылырынга белен кандыг-даа ажыл-агый субъектизи инвестор бооп болур. Инвесторнуң чарыгдалының 90 хуу чедир кезээн федералдыг бюджеттен эгидип бээрин магадылап турар.
Республикада 2025 чылда Таңды кожууннуң Балгазын суурда база Чөөн-Хемчик кожууннуң Чадаана хоорайда ийи агротехнология класстары тургустунган. Чадаанада 16 өөреникчиге тускай угланыышкынныг 10-гу классты тускайлаан. Агротехнологияже угланган класстан дашкаар ажыл-чорудулгалыг 7-9 класстарда 45 өөреникчи хаара туттунган. Балгазын суурда тускай угланыышкынныг 10-гу класста 15 кижи өөренип турар. 7-8 класстарның кичээлден дашкаар агроклазында 25 өөреникчи бар.
«Технологтуг хандырылга болгаш аъш-чемниң айыыл чок чоруу» национал төлевилелдиң «Агроүлетпүр комплекизинде кадрлар» федералдыг төлевилели 2025 чылдан эгелеп чурттуң агроүлетпүр комплекизиниң аъш-чемниң айыыл чок чоруунуң болгаш хөгжүлдезиниң ниити стратегиязының бир кезээ кылдыр боттанып турар.
ТР-ниң Чазааның парлалга албаны.