Эрткен неделя дургузунда саргыга ызырткаш, эмнелге албан черлеринче дуза дилеп, 24 кижи келген. Үш чурттакчы саргыдан дамчыыр вирустуг энцефалиттен аараан, ол ышкаш иксод боррелиозу чаңгыс кижиге илереттинген.
Хоралыг хан сорардан дамчыыр вирус энцефалиди кадыкшылга аар салдарлыг, төп нерв системазынга хора чедирип, чартыктап болур айыыл улуг. Амы-тынындан чарылган таварылгалар база эвээш эвес. Ынчангаш баш удур тарылга салдыртыры чугула. Чүге дизе саргыга ызырткан болза, амгы үеде халдавырлыг аарыгларга удур салыр вакциналар чок.
Тайга-сыннарже азы ховуларже чедер бетинде, баш удур камгаланып ап болур. Чижээ, чырык өңнүг хепке саргы дораан көстүп келир, оон аңгыда хөйлең болгаш курткаларның чеңнери кылын болгаш узун болур болза эки. А чүвүрнүң унун уктарже киир суп алыр.
Эң кол чүүл — башка аржыыл шарыыр азы бөрт кедер. Ол ышкаш саргыга хоралыг аэрозольдарны бижип каан айтыышкыны ёзугаар ажыглаары чогумчалыг.
Ниитизи-биле бо чылдың март айдан тура 958 кижиге саргылар чыпшынган. Оларның аразындан 373 – чаштар. 28 кижи вирустуг энцефалиттен аараан, а боррелиоз чеди кижиге илереттинген, риккет- сиоз — 13.
Бистиң корр.
Росхереглелхайгааралдың албан ёзу сайтызындан алган чурук.
“Шын” №28 2025 чылдың июль 24