1988 чылдан эгелеп, чылдың-на декабрь 1-де, Бүгү-делегейниң СПИД-ке удур демисел хүнүн демдеглеп эгелээн. Декабрь 1-де бүгү делегейниң чоннары ВИЧ-ке удур демиселди күштелдирип, янзы-бүрү хемчеглерни организастап турар.
Бүгү-делегейниң СПИД-ке удур демисел хүнүнге тураскаадып, Кызыл хоорайның “Найысылал” уран чүүл төвүнге «Кады» деп ыры мөөрейи болуп эрткен. Республиканың эмчи колледжизиниң 2-ги курузунуң сургуулдарының «Тыва» ансамбли ыр-шоорун бараалгаткан. Чогаадыкчы чоруун чаа-ла эгелеп чоруур келир үениң эмчилери кайгамчык салым-чаяаны-биле көрүкчүлерни магадаткан. Мөөрей ВИЧ-биле аараан улуска дузаны көргүзүп, халдавырлыг аарыг чок ниитилелди тургузары-биле ажылдаар дээн сорулгаже чугула базым болган.
Хемчегге аңгы-аңгы адырлардан 26 кижи киришкен. Оларның аразында ажылчын коллективтерниң төлээлери, эмнелге ажылдакчылары, студентилер болгаш сонуургалдыг кижилер бар. Мөөрейниң темазы хостуг болгаш киржикчилерниң чогаадыкчы чоруу делгемчип, кижи бүрүзү бодунуң салым-чаяанын бараалгадыр аргалыг болган.
“Кызыл кожааны шарыттынгаш, бо мөөрейге киржип турар кижи бүрүзү ВИЧ халдавырлыг аарыгдан оваарныр дугайында кыйгырыгны чонче салып турар. Тиилекчилерни үнелиг белектер манап турар” – деп, Республиканың СПИД-ке удур демисел төвүнүң улуг эмчизи Инна Санчы чугаалаан.
ВИЧ ам-даа ниитилелдиң чидиг айтырыы болбушаан. Тывада чыл санында-ла дөртен беш чедир ВИЧ халдавырлыг аарыгдан аараан чаа таварылгалар илереттинип турар. Амгы үеде 339 кижи Тываның СПИД-ке удур демисел төвүнүң эмчилерниң тускай хайгааралында эмнедип турар.
СПИД-ке удур демисел хүнүнде мөөрейден аңгыда, күзелдиг кижилер халас шинчилгени эртип, кадыының байдалын билип алырынга, эмчи дузазын үе-шаанда алырынга дузалаар анализтерни дужааган.
Бистиң корр.
Чурукту интернеттен хоолгалаан.
“Шын” №47 2025 чылдың декабрь 4