ГУБЕРНАТОР ТӨЛЕВИЛЕЛИ |
Одалга сезонунда чурттакчы чонга деткимче көргүзеринче угланган «Социал хөмүр-даш» губернатор төлевилелиниң боттаныышкыны Тывада уламчылап турар. Бо чылын 3887 өг-бүле оттулар чүүл деткимчезин алыр. Ол дээрге орулгазы эвээш өг-бүлелер, ол ышкаш тускай шериг операциязының киржикчилериниң өг-бүлелери-дир.
Тыва Республиканың Чазааның 2020 чылдың март 23-те үнген 105 дугаарлыг доктаалы ёзугаар өг-бүле бүрүзү 2145 кг хөмүр-дашты база 4,8 куб метр оттулар ыяшты алыр.
ТР-ниң Күш-ажыл болгаш социал политика яамызының дужаалы ёзугаар 2025 чылда социал дузаны ниитизи-биле 3887 өг-бүле, ооң иштинде 4-тен көвей ажы-төлдүг болгаш эвээш орулгалыг өг-бүлелер — 2581, 1306 тускай шериг операциязының киржикчилериниң өг-бүлелери алыр. Ол өг-бүлелерниң 3776-зы хөмүр-даш алыр (ниитизи-биле 8100 тонна), а 111-ин ыяш-биле (ниитизи-биле 533 куб метр) хандырар.
2025 чылдың июль 28-те бадылаан даңзыны Тыва Республиканың Энергетика болгаш кывар-чаар чүүл яамызынче хөмүр-дашты болгаш одаар ыяштың сөөртүлгезин боттандырары-биле чагаа кылдыр чоруткан.
2025 чылдың ноябрь 6-ның байдалы-биле алырга, Тыва Республиканың Энергетика болгаш кываар-чаар чүүл яамызы ниити акшаландырыышкынның 30 хуузун Күрүнениң чаңгыс бүдүрүлгези «Транспорт сервизи болгаш төлевилел» күрүнениң унитарлыг бүдүрүлгезиниң агар санынче шилчиткен. Бо хүннерде тургустунган график ёзугаар боттуг дуза социал хөмүр-даш алыкчыларынга чедиртинмээн.
2025 чылдың социал хөмүр-даш алыкчыларынга дуза декабрь 31-ге чедир чардынган керээ ёзугаар чедери көрдүнген. Ноябрь 12-ниң көргүзүү-биле одаар ыяшты Тере-Хөл кожууннуң бүгү «Социал хөмүр-даш» алыкчыларынга чедирген.
Бистиң корр.
Чурукту интернеттен хоолгалаан.
“Шын” №45 2025 чылдың ноябрь 20