РСФСР-ниң өөредилгезиниң тергиини, ССРЭ-ниң алдарлыг башкызы Майны Бадыевич Салчак бодунуң башкылаашкын ажылының 60 чыл стажының 30 ажыг чылын Шуй школазынга ажылдаан.
Ооң чырык адының Шуй школазының 101-ги чылында Майны Бадыевичиниң адын тыпсыр дугайында сумузунуң Төлээлекчилер хуралының шиитпиринге үндезилээш, Бай-Тайга кожууннуң Төлээлекчилер хуралы доктаалды хүлээп алган. Шуй сумузунуң чон хуралынга кожууннуң баштыңы, чагырга даргазы Роберт Аракчаа Шуйнуң школазынга Майны Бадыевич Салчактың адын тыпсыр дугайында доктаалды номчуптарга, залда чон шупту туруп келгеш, диңмиттиг адыш часкаашкыннары-биле уткаан. Ол адыш часкаашкыннары чоннуң өөрүшкүзүнүң база деткимчезиниң илергейлээшкининиң херечизи болган.
Өөрүшкүзүн илередип, хөй кижи сөс алган. Маны Бадыевич-биле кады ажылдап чораан техниктиг ажылчыннар: Долума Хертек, Роман Савындай, Кызыл-Уруг Саая. Олар башкының эптиг-чөптүг, кижизиин, хүндүлээчелин, үнүн бедитпес, чүгле чагып чугаалаарын, культурлуун, биче сеткилдиин сактып чугаалааннар. Улус өөредилгезиниң хоочуннары: Күске Делгеровна Салчак, Ким-оол Көк-оолович Сарыг-Донгак, Полина Хертековна Балдың, Валентина Арагачыевна Амыртак, Дадар-оол Сүрүңович Хомушку, Каң-оол Хертекович Чошкак болгаш өөреникчилери: Светлана Самбый-оол, Чойган Хертек, Аңнаар-оол Хертек болгаш Шуй сумузунуң чагырга даргазы Юрий Дамбыл олар башкызының дугайында чылыг сактыышкыннарны чыылганнарга чугаалап бергеннер.
Ооң соонда кожуун болгаш сумулар школаларындан болгаш уруглар албан черлеринден төлээлер сөс ап, боттарының белектерин школага бергеннер.
Кожууннуң баштыңы Роберт Адар-оолович байыр чедирбишаан, Майны Бадыевичиниң оглу Майны Мергенге база хоочун кадарчы Арбай-оол Серенотка ТАР-ның ССРЭ-ге каттышканындан бээр 80 чылдаан оюнуң медальдарын тывыскан.
Кожууннуң өөредилге департаментизиниң болгаш школаның баштаар чериниң хүндүлел бижиктери-биле эки ажылдыг хоочун болгаш аныяк башкыларны шаңнаан.
Байырлалды школаның өөреникчилериниң болгаш башкыларының солун концерти-биле дооскан.
Ким-оол САРЫГ-ДОНГАК, Тыва АССР-ниң алдарлыг башкызы, Тываның чогаалчылар эвилелиниң кежигүнү.
«Шын» №93 2024 чылдың декабрь 4