3800 өг-бүле социал керээни чарып болур

ТР-ниң Күш-ажыл болгаш социал политика яамызының медеглээни-биле алырга, чаа үнген чылдың февраль 1-ден эгелеп социал керээ программазынга киржир күзелдиглерниң документилерин хүлээп эгелей берген. 2023 чылда Тываның 3,8 муң чурттакчызы социал керээни чарып, күрүне деткимчезин ап болур.

Социал керээ дөрт угланыышкынныг. Бирээде, ажыл чок хамаатыларны ажылга тургузары. Ийиде, хууда сайгарлыкчы чорук азы бодун боду ажылга хаара тудары. Бо угланыышкын-биле социал керээ программазынга киришкен хамаатылар күрүнеден 350 муң рубль деткимчени алыр. Үште, хууда дузалал ажыл-агыйы эгелээр дээн хамаатыларга 200 муң рубль деткимче бээр. Дөрт дугаар угланыышкынга берге байдалга таварышкан өг-бүлелер хамааржыр. Чижээлээрге, электри чырыы, изиг-соок суг дээн ышкаш төлевирлеринге күш четпейн барганда, уругларын школаже кииреринге белеткеп чадай бергенде, идик-хеп, аъш-чем, хөмүр-ыяш дээш оон-даа өске амыдыраарынга чугула херек чүүлдер садарынга дузалажыры.

Бо чылын 1200 хамаатыны ажылга тургузар. 1050 кижи бодун боду ажылга хаара тудуп эгелээр ужурлуг. 730 өг-бүле дузалал ажыл-агыйын эгелээр. Берге байдалга таварышкан 900 өг-бүле-биле социал керээни чарар.

Социал керээниң баштайгы үш угланыышкынының бирээзи-биле күрүнеден деткимче алыр дизе, киир бижидилгелиг, чурттап турар чериниң Чонну ажылга хаара тудар төвүнге чеде бергеш, чогуур документилерни дужаар. Эң-не сөөлгү угланыышкынга киржирде, тус черлерде өг-бүлелерге болгаш уругларга дуза кадар социал төптерни таварыштыр алыр.

Эрткен 2022 чылда Тывага 8 муң хире хамааты социал керээ программазынга киржир дээш документилерин дужааган болза, 4073 хамааты деткимчени алган. 1624 кижини керээ езугаар ажылга тургускан, а 1221 хамааты хууда сайгарлыкчылар апарган. 706 өг-бүле дузалал ажыл-агыйын ажыдып алган. 623 берге байдалга таварышкан өг-бүле күрүне деткимчезин алган.

Айдың ОНДАР.