Чеди-Хөл кожууннуң Хову-Аксы суурда Спортивная кудумчузунда 12 квартиралыг бажыңның база бир тудуу доозулган. Эргижирээн ийи бажыңдан үжен тос чурттакчыны чаа квартираларже көжүрер. Тываның Чазаа «Амыдыралга инфраструктура» национал төлевилелдиң «Чуртталга оран-савазы» федералдыг төлевилели ёзугаар чурттакчы чоннуң айыыл чок чуртталга байдалын хандырарын боттандырган.
Эргижирээн чуртталга бажыңнарындан хамаатыларны өскээр көжүрер программа киржикчилеринге 2020-2024 чылдарда Хову-Аксы суурда хөй аал чурттаар чеди бажыңны туткаш, 312 кижиниң чурттаар байдалын экижиткен.
Регионалдыг эрге-чагырганың күжениишкиннери-биле 2017 чылдың январь 1-ге чедир ынчаар санаан эргижирээн чуртталга бажыңнарындан чурттакчыларны көжүрер программа ийи муниципалдыг тургузугда – Кызыл хоорайда болгаш Кызыл кожууннуң Каа-Хем суурда доозулган.
Регионнуң Чазаа Чеди-Хөл кожууннуң Хову-Аксы суурда 4,6 муң дөрбелчин метр аварийлиг бажыңнардан 288 кижини өскээр көжүрер программаны доозар дээш, акша-хөреңги дилээр ажылды уламчылап турар.
Федералдыг ведомстволарга регионалдыг программаны бадыткап камгалаанының ачызында, Россия Федерациязының Чазаа бо чылдың сентябрьда 70,2 сая рубльди бадылаан, ооң акша-хөреңгизи-биле аварийлиг бажыңнардан 41 кижини 2026 чылдың төнчүзүнге чедир өскээр көжүрер. 565 дөрбелчин метр ниити шөлдүг ийи аварийлиг бажыңда – Кызылда Эрзинская кудумчузу, 31 дугаар бажыңда база Кызыл кожууннуң Каа-Хем хоорайжыткан суурда, Пионерская кудумчузу 26 дугаар бажыңда 15 өг-бүлени өскээр көжүрери планнаттынган.
ТР-ниң Чазааның медээзинден.
Чурукту интернеттен алган.
“Шын” №46 2025 чылдың ноябрь 27