“Айыыл чок болгаш шынарлыг оруктар” национал төлевилелдиң чорудуун республиканың Чазааның хуралынга сайгарып чугаалашкан.
Тывага сөөлгү үш чылда 400 километр ажыг автомобиль оруктарын болгаш 22 көвүрүгнү эде чаартып септээнин, 2025 чылда ниити узуну 156 километр 33 орук участоктарын чаартып септээрин планнаанын Тыва Республиканың Чазааның хуралынга орук-транспорт сайыды Шораан Чыргал-оол илеткээн. Бии-Хем кожуунда Хадың, Бай-Тайга кожуунда Тээли суурларже кирер оруктарны, Бояровка – Доора-Хем, Мугур-Аксы – Кызыл-Хая аразында автооруктарны, Бүрен-Аксы – Элегес-Аксы– Кунгуртуг кышкы оруктуң Сизим суурга чедир участогун, Хадың биле Дус-Хөл хөлдерже кирер оруктарның байдалын нормативтиг негелделерге дүүштүр чаартып септээри планнаттынган.
Россия биле Моол күрүне кызыгаарында Хандагайты эрттирилге пунктузунуң тудуг-монтаж ажылдарын доозуп, ону хөй талалыг чурумга эрттирилге пунктузун долузу-биле ажылдадыры, Улуг-Хемни кежир Баян-Кол суурже көвүрүгнүң төлевилел-смета документациязын ажылдап кылыры, ол ышкаш Кызылдың аэропорт комплекизинче пассажирлер аргыштырылгазын сайзырадыры 2025 чылда ажылдарның планынче кирген.
Чоокку алды чылдың планынче 575 хире километр оруктарны септээри болгаш тудары, “Чуртталганың инфраструктуразы” национал төлевилелдиң угланыышкыны-биле машиналар тургузар черлер — парковкаларны болгаш чадаг кижилер кылаштаар оруктар тротуарларын чаартыр болгаш чаагайжыды септээри кирген.
Тыва Республика биле Россияның Автоорук яамызының аразында чарган 10 миллиард рубль хемчээлдиг, 2030 чылга чедир хуусаа үезинде күштүг Меморандумнуң акша-хөреңгизиниң хемчээлин тургустунуп кээп болур байдалдар-биле холбаштыр эде көрүп болурун Тываның Баштыңы Владислав Ховалыг чугаалаан. Чүге дээрге бо Меморандумда өзек чүүл — Азия болгаш Оожум океан девискээринче транспорт коридорун ажыдары Тываның девискээринде автоорук инфраструктуразын хөгжүдери-биле харылзаалыы.
ТР-ниң Орук-транспорт яамызының медээлеринден.
Чурукту интернет четкизинден хоолгалаан.
“Шын” №13 2025 чылдың апрель 10
