РФ-тиң Чазааның Даргазы Михаил Мишустин регионнар аразынга техника үлээр дугайында айтыышкынга атты салган. Ук документ езугаар алырга, Тыва Республиканың школалары бо чылын 47 чаа автобусту алыр деп, ТР-ниң Баштыңы Владислав Ховалыг дыңнаткан.
«Автобустарның шуптузун Россияга кылган. Оларның хемчээли аңгы-аңгы. 47 автобустуң 15-ин аргыжар оруу нарын, чедери берге черлерниң школаларынче чорудар» – деп, Владислав Ховалыг медеглээн.
Тыва Республиканың Өөредилге яамызының медеглээни-биле алырга, бо хүннерде Тываның школаларында 238 автобус бар. Чаа автобустарны техниказының хуусаазы төнүп турар школалар алыр. Негелде езугаар школа автобузу он чылдан хөй үе дургузунда ажылдавас ужурлуг. Мөңгүн-Тайга кожуунга 3 аңгы маркалыг автобусту бээр. Чаа туттунуп турар 11 школа база автобусту алыр.
"GAZelle NEXT" деп маркалыг чаа үениң автобустары удавас Тывага келир. Автобус бүрүзүнде ГЛОНАСС системазын быжыглаан турар ужурлуг.
2021–2024 чылдарда федералдыг бюджеттен үндүрген акша-биле школаларның автопарктарын чаартыр дугайында даалганы Россияның Чазаанга Россия Федерациязының Президентизи Владимир Владимирович Путин берген дээрзин сагындыраал.
Бистиң корр.
Чурукту интернет четкизинден хоолгалаан.
"Шын" №55 2024 чылдың июль 24
![](https://shyn.ru/media/cache/2024/07/24/nxtmnohhxl2udze5yi5-c9zgqu4q1hgqkyem0hkl-tcr0fzpcn20otknniq6jjrivnss65rymn5hnfsnluumy5t6-6f17e9453b.jpg)