Чайгы дыштанылга лагерлериниң ажыттынарынга чедир санныг хүннер арткан. Аңаа 34 муң уругну дыштандырары планда көрдүнген. Ооң мурнунда чылдарда РФ-тиң Президентизи Владимир Путинниң айтыышкыны-биле күрүне программазының дузазы-биле лагерьже путёвка өртээниң чартыын ада-иелерге эгидип бээр турган. Ук программа хамчыктыг коронавирус аарыы өөскүп турган чылдарда ажылдап турган. Амгы үеде ооң ажылын аарыгның оожургаанын барымдаалааш, соксаткан. Ынчалза-даа эки медээ – Тываның удуртукчузу Владислав Ховалыгның даалгазы-биле путевка өртээниң чартыын ада-иелерге эгидип бээр республика программазын ажылдап кылган.
Ук программа дузазы-биле путевка өртээниң чартыын эгидип алыр дизе, Кызыл хоорайның өөредилге департаментизинче болгаш кожууннарның өөредилге эргелелдеринче тускай даңзы ёзугаар документилерни четчелеп алгаш, билдириишкин киирер дугайында өөредилге сайыдының хүлээлгезин күүседип турар Елена Хардикова дыңнаткан:
- Хүндүскү лагерьлерниң путевка өртээ 5565 рубль, стационар лагерьлерниң – 15645 рубль. Стационар лагерьлерниң путевкаларының 50 хуузун регион бюджединиң акшаландырыышкыны-биле эгидип бээр. Акшаландырыышкынны муниципалдыг тургузуглар аразынга хувааган база өй-хемчээлдиг кылдыр кызыгаарлаан. Билдириишкинни мурнай киирген ада-иелерниң уругларының путёвкаларының чартык хуузун эгидип бээри көрдүнген.
Республикага ниитизи-биле 166 лагерь – 145 хүндүскү болгаш 19 хоорай болгаш суурдан дашкаар лагерьлерге – уругларны дыштандырар. Бо чылдың чайгы дыштанылга лагерьлериниң бир онзагайы – майгынга чурттаар 2 лагерьниң ажылын чорудары болур. Аңаа “Баштайгыларның шимчээшкини” хөй-ниити организациязының сменалары болуп эртер.
/ Алиса ДОНГАК.
Чурукту интернет четкизинден алган.
