2024 чылдың эгезинден тура Россияның Социал фондузунуң Тыва Республикада салбыры келир үениң аваларынга 657 чаңгыс аай пособиени тывыскан. Ону иштелип-саатталганының эртежик хуусаазында (12 неделя чедир) эмнелге албан чериниң учедунга туруп алган херээжен алыр эргелиг.
Ооң-биле чергелештир өг-бүле кежигүн бүрүзүнүң ай санында орулгазы чурттакчы чоннуң бүрүзүнге онааштыр амыдырап-чурттаарының регионда эң кудуку хемчээлинден ашпас болур ужурлуг (Тывада ол — 15608 рубль). Ынчаарда өг-бүлениң өнчү-хөреңгизи доктааттынган негелделерге дүүшкен, а иштиг херээжен кижиниң боду Россияда чурттап, ооң хамаатызы болур ужурлуг.
Келир үениң аваларынга чаңгыс аай пособиениң хемчээли өг-бүлениң материалдыг байдалындан хамааржыр болгаш ажылдаар шинектиг кижилерниң амыдырап-чурттаарының эң кудуку хемчээлинден тодараттынар (Тывада — 17013 рубль) болгаш ук хемчээлдиң 50, 75 азы 100 хуузу болуп болур:
100 хууну чөпшээрээнде, 17013 рубль;
75 хууну чөпшээрээнде, 12759,75 рубль;
50 хууну чөпшээрээнде, 8506,5 рубль.
Социал фонд социал казначейство черин таварыштыр чаңгыс аай пособиени тыпсыр. Ол чүл дизе, билдириишкин ээзи Күрүне ачы-дузазының порталын таварыштыр ону киирип каарга-ла, четчир. Өске арткан сан-медээлерни фондунуң специалистери албан черлериниң аразында кады ажылдажылганың иштинге хынаар.
Иштелип-саатталганының 12 неделязының соонда, херээжен кижи билдириишкин кииргенде, пособиени учётка туруп алганы айдан эгелеп (ынчалза-даа иштелип-саатталганының 6 неделязындан эрте эвес), божугуже чедир төлээр.
Чаңгыс аай пособиени тыпсырының болгаш төлээриниң айтырыгларын ажыл хүннериниң 9-тан 18 шагында Россияның Социал фондузунуң Тыва Республикада салбырының харылзаа төвүнден билип ап болур (88002000543).
А. ХЕРТЕК белеткээн.
«Шын» №28 2024 чылдың апрель 13