Тываның техникумнарынче болгаш колледжтеринче документилер хүлээп алыышкыны август 15-ке чедир үргүлчүлээр. Июль 25-ке чедир безин 6 муң 500 билдириишкин кирген, эрткен чылга деңнээрге, 1000 кижи хөй. Оларның 75 хуузу 9 класс доозукчулары.
Эрткен неделяда ортумак профессионал өөредилге черлериниң хүлээп алыышкын кампаниязының ажылын РФ-тиң Чазак даргазының оралакчызы Дмитрий Чернышенко биле РФ-тиң Чырыдыышкын сайыды Сергей Кравцов чугаалап тура, техникум болгаш колледжтерже дужаап кирер күзелдиг улустуң саны өскенин демдеглээннер.
«Ажылчын мергежилдерге өөренип алыр күзелдиг абитуриентилер саны чылдан чылче көвүдеп турар. Колледжтер болгаш техникумнарның доозукчулары ажыл берикчилеринге хереглелдиг. Эрткен чылдың бо үезинге деңнээрге, ам безин билдириишкин киирген улустуң саны 800 муң чедип турар. Президент Владимир Путинниң салган сорулгалары боттанып олурар, ол эки түңнел-дир. 2028 чылга чедир 1 сая специалисти болгаш тускай эртемниг ажылчыннарны белеткеп алыр» — деп, Дмитрий Чернышенко чугаалаан.
2025–2026 өөредилге чылында ортумак профессионал өөредилге черлери 3181 олутту берип турар. Техниктиг мергежилдерге – 1930, көдээ ажыл-агый – 455 бюджет олуттарны аңгылаан. А 700 ажыг олут хандырылга адыры, медицина, өөредилге болгаш күш-культура, ол ышкаш уран чүүл болгаш культура угланыышкыннарынга көрдүнген.
Россияның Чырыдыышкын сайыды 2025 чылдың хүлээп алыышкын кампаниязының үезинде ортумак өөредилге черлеринге сонуургал улгатканын демдеглээн. Чоокта чаа Россияның Президентизи Владимир Путинниң эрттиргени өөредилге айтырыгларынга тураскааткан хуралынга өөреникчилер аразында инженер мергежилдиң сурагжаанын демдеглеп чугаалаан. Ооң чугаазы-биле, школаларның доозукчулары ажылчын мергежилдерже өөренип кирип турар.
«Тыва Республикада сөөлгү чылдарда профессионал колледжтер болгаш техникумнарже аныяктарның сонуургалы улгадып турар. Ол чүнү тайылбырлап турар дээрге «Профессионалитет» деп федералдыг төлевилел таварыштыр ортумак профессионал өөредилге системазын күрүне идепкейлиг деткип турар» — деп, Тываның агроүлетпүр техникумунуң директору Ольга Баркова демдеглээн. — Сургуулдар өөредилге үезинде-ле чаа дериг-херекселдерге практиктиг арга-мергежилдерге өөренип, регионнуң бүдүрүлгелери-биле керээлерни чарып, ооң ачызында доозукчулар өөредилгезиниң соонда дораан ажылды тып ап турар».
Ортумак профессионал өөредилге черлериниң хүлээп алыышкын кампаниязы июнь 20-ден август 25-ке чедир уламчылаар. Абитуриентилер чүгле Тываның эвес, Россияның ортумак профессионал өөредилге черлеринче база документилерин дужаап болур. «Поступление в вуз онлайн» деп суперсервисти база ажыглаар аргалыг. Ол Суперсервисте ортумак профессионал өөредилге программаларын боттандырып турар, ооң иштинде салбырлары-биле катай 722 федералдыг дээди өөредилге черлерин киирген.
А. СОЯН белеткээн.
Чурукту болгаш медээни ТР-ниң Өөредилге яамызының социал четкиде арнындан алган.
“Шын” №29 2025 чылдың июль 31