Май 31-де Россияның ИХЯ-ның системазында назы четпээннер-биле ажыл чорудар кезектиң болгаш чурум үрээн назы четпээннерни түр када тудар төптерниң тургустунганындан бээр 90 чыл оюн бүгү Россияга демдеглеп эрттирген.
Тывага аңаа тураскааткан байырлыг хемчег май 30-де Тыва үндезин культура төвүнге болуп эрткен. Аңаа ТР-ниң Чазак Даргазының оралакчызының хүлээлгезин күүседип турар Айдыс Сынаа, ТР-ниң Дээди Хуралының (парламентиниң) депутады Аяс Санчат, РФ-тиң Тыва Республикада ИХЯ-ның сайыдының хүлээлгезин күүседип турар Антон Матвеев болгаш яамының эргелелдери, килдистериниң удуртукчулары, РФ-тиң Тыва Республикада ИХЯ-ның хоочуннар чөвүлелиниң даргазы, полицияның халажылгада полковниги Валерий Тарыма, Тыва Республикада уруглар эргелериниң талазы-биле бүрүн эргелиг төлээ Саида Сенгии болгаш назы четпээннер-биле ажыл чорудар килдистиң хоочуннары киришкеш, чыылганнарга байыр чедирген. Сөс алган удуртукчу бүрүзү өзүп олурар салгалдың назы четпээн үезинде таваржып турар нарын айтырыгларын үе-шаанда шиитпирлежип, оларны шын орукче углап-баштап, чагыг-сөзүн берип, кижизидилге ажылын дүн-хүн чок чорудуп турары полицияның ажылдакчыларының кылып турар үүле-херээнге бедик үнелелдерни берген.
РФ-тиң Тыва Республикада ИХЯ-ның сайыдының хүлээлгезин күүседип турар Антон Матвеев юбилейлиг чылын демдеглеп турар килдистиң бүгү хоочуннарынга болгаш амгы ажылдап турар полиция ажылдакчыларынга назы четпээннер аразынга чурум үрээшкиннерин баш удур болдурбас дээш, улуг күжениишкинниг ажылды чорудуп турарын демдеглээн:
“Назы четпээннер аразында хоойлу хажыдыышкынын кылган уруглар-биле ажылды чорудуп тура, оларны моон соңгаар ындыг частырыглар кылбайн, күрүнениң бүрүн эргелиг хамаатылары болурун билиндирип, шын орукче углап баштаар ажылды чорударынга бедик мергежил, байлак дуржулга, оперативтиг байдалдарда кончуг дүрген шын шиитпирни хүлээп, ада-иелер-биле эп-чөптүг чугаалажып билири болгаш педагогика, психология талазы-биле билиглер негеттинерин билир бис. Силерниң шак бо белен эвес кылып чоруур ажыл-ижиңерни бедии-биле үнелеп, четтиргенивисти илередип тур бис!” – деп, ол чугаалаан.
Байырлыг хуралга назы четпээннер-биле ажыл чорудар килдистерниң амгы ажылдап турар шылгарааннарын демдеглеп, хоочуннарга шаңнал-макталды тывыскан соонда, Тываның сураглыг артистериниң солун концерт-көргүзүү-биле байырлыг хемчег доозулган.
К. МОНГУШ, РФ-тиң Тыва Республикада ИХЯ-ның парлалга албанының медээзи болгаш чуруктары.
«Шын» №21 2025 чылдың июнь 5
