Өвүр кожууннуң төвү Хандагайты суурнуң культура одаанга Чоннуң чаңгыс деминиң хүнүнде ажылчын коллективтер аразынга кончуг солун мөөрейни эрттирген. Аңаа кожуун төвүнүң коллективтери, албан черлери, суурнуң арбаннары болгаш хөй-ниитижилери аңгы-аңгы омактыг чоннарның культуразын, ёзу-чаңчылдарын таныштырып, танцы-самын, ыр-шоорун тус-тузунда бараалгатканнар.
Хандагайты школазы индий, кожуун чагыргазы бурят, социал ачы-дуза чедирер төп испан, "Чечек" уруглар сады чукча, Төп ном саңы кожууннуң хоочуннары-биле орус чонну көргүскен.
Түңнелинде, испан чонну көргүскен Социал ачы-дуза төвү тиилекчи болган. Ийиги черни якут чонну бараалгаткан коллектив төлептии-биле чаалап алган. Үшкү черге бурят чонну көргүскен кожуун чагыргазы келген. Ол ышкаш арткан киржикчилерни тускай шаңналдар-биле тус-тузунда шаңнаан.
