Тываныӊ Чазаа «Аӊнаашкын болгаш аӊныыр курлавырын кадагалап арттырарыныӊ дугайында» Тыва Республиканыӊ хоойлузунга чогуур эдилгени киирген.
Аӊныыр инспекторларыныӊ социал камгаладылгазыныӊ немелде хемчеглериниӊ дугайында хоойлужуткан норманы 2023 чылдыӊ май 31-де Күрүне Думазы федералдыг деӊнелге бадылаан.
Аӊаа дүүштүр регионалдыг хоойлуга чогуур эдилгени киирген дээрзин Тыва Республиканыӊ Дириг амытаннарныӊ чурттап турар объектилериниӊ камгалалыныӊ талазы-биле күрүне комитеди тайылбырлаан.
Аңныыр инспекторларыныӊ ажылы айыыл-халаптыг, озал-ондактыг. Инспекторлар ок-чемзектиг төтчеглекчилерге удур туржуп, оларныӊ хоойлуга чөрүштүр өлүрүп алган аӊ-меӊин, чепсээн хавырып турар. РФ-тиӊ Бойдус яамызыныӊ медээлери-биле алырга, бо сөөлгү 5 чыл дургузунда ажыл-албанын күүседип тургаш, 8 инспектор мөчээн, бойдус камгалаар ведомстволарныӊ 37 ажылдакчылары кемдээн.
Хоойлу төлевилелин Тываныӊ Дээди Хуралынче чорудупкан. Хоойлуну доктаадып бадылаан соонда, ол 2024 чылдыӊ январь 1-ден тура күштүг апаар. Күрүнениӊ аӊныыр инспекторлары амы-тынын болгаш кадыкшылын албан камгаладыр. Бир эвес ажыл-албанын күүседип тургаш амы-тынындан чарылган болза, камгаладылга ёзугаар 1,5 млн рубльди ооӊ чоок улузунга бээр. Кемдээшкин соонда, кадыыныӊ байдалы-биле I бөлүктүӊ инвалиди апарган болза, 1 млн 125 муӊ рубльди, II-ги бөлүктүӊ – 750 муӊ, III-кү бөлүктүӊ инвалиди болза, аӊаа 375 муӊ рубль акша-хөреӊгини төлеп бээр.
ТР-ниӊ Чазааныӊ медээлеринден.
"Шын" №62, 2023 чылдың август 23
