Дүүн, август 27-де, Москвада Тыва Республиканың бүрүн эгелиг төлээ чери ”Школаже чыгдынарынга дузалаш!” деп ачы-буян акциязын эрттирген.
Ооң сорулгазы – хөй ажы-төлдүг, шыдалы чегей өг-бүлелерден уругларга, а ол ышкаш ТШО киржикчилериниң ажы-төлүнге өөредилге чылының эгезинде школаже чыгдынарынга адрестиг дуза кадары.
Тыва Республиканың Чазак Даргазының оралакчызы — Тыва Республиканың Москвада бүрүн эргелиг төлээзи Чечен Чоксум болгаш бүрүн эргелиг төлээ чериниң ажылдакчылары өөредилге чылының бүдүүзүнде уругларга белек-селекти тывысканнар. Өөреникчи бүрүзү бөлүк кыдырааштарны, школачы херекселдерни, а бичии класстың өөреникчилери чурулга кичээлинге хереглээр дериг-херекселдерни алганнар. Ол ышкаш өөреникчилерниң дилээн ёзугаар оларга чүктээр рюкзакты болгаш спортчу идик-хепти сөңнээннер.
Тыва Республиканың Москвада бүрүн эргелиг төлээ чери «Этномир» этнографтыг музей паркты (http://t.me/ethnomirru) база хууда сайгарлыкчы А.В. Шпунтовту ачы-дуза акциязын эрттиреринге деткикчилээни дээш өөрүп четтиргенин илереткеннер.
/ А. ХЕРТЕК белеткээн.
“Шын” №65 2024 чылдың август 28
