Тываныӊ найысылалы «Гармония менден эгелээр» деп девизтиг, ачы-буянныг онзагай төлевилелдиӊ киржикчилерин уткуп турар.
Эп-найыралды, гармонияны болгаш чаӊгыс эп-сеткилди илередирин күзээн кижи бүрүзү эстафетаныӊ одун, факелин тудуп болур.
«Бег Гармонии» деп эстафетаны Россияга 25 дугаар эрттирип турар. Баштайгы эстафетага 20 харлыында киржип турган кижи ам 40 ажыг харлыг. А бичиизинде аӊаа киржип эгелээн уруглар ам улуг кижилер апаргаш, бо магаданчыг чаӊчылды ам-даа уламчылап турарлар.
Гармонияныӊ оду – факели янзы-бүрү кижилерни, улус-чонну, чаштарны, улуг назылыг өгбелерни, бөдүүн хамаатыларны, делегейде ат-сураглыг кижилерни каттыштырып турар.
Делегейде шупту улус бот-боттарын билчир, амыр-тайбыӊ чурттаарын сеткилинден күзеп, идегеп чоруур. Кижи бүрүзү ачы-буянныг күзел-бодалды бүгү делегейге нептередип тарадырынга бодунуӊ үлүүн киирип, эстафетага киржип болур. Эстафетаныӊ кол киржикчилери дээрге волонтерлар командазы, профессионал спортчулар, спортка ынак кижилер-дир.
2023 чылыӊ май 10-да Гармония эстафетазыныӊ одун маадырлыг Новороссийск хоорайга кывыскан. Киржикчилери чадаг маӊнавышаан, факелди холдан холче дамчыдып турар. Олар бо чылын эстафетага 6 500 км черни шак ынчаар маӊнап эртер ужурлуг.
Май 10-да эстафетаныӊ барыын талада угланыышкынын Новороссийск хоорайга эгелээн чарыш командазы Краснодар крайныӊ, Адыгей, Карачаево-Черкесск, Калмык республикаларныӊ, Ставрополь крайныӊ, Волгоград, Пенза, Тамбов, Рязань областарныӊ хоорайларын таварып эрткен.
Июнь 7-де Россияныӊ найысылалынга чедип келгеш, маргылдааларга киржип турган.
Июнь 16-да эстафетаныӊ командазы Москвадан үнгеш, Гармония факелин тудуп алгаш, Москва, Вологда, Ярославль, Иванов, Нижний Новгород областарныӊ, Марий Эл биле Чуваш республикаларныӊ хоорай, суурларын таварып эрткеш, июль 10-да чарышты Чебоксары хоорайга дооскан. Эстафетаныӊ барыын талада угланыышкынында командазы 3 280 км черни маӊнап эрткен.
Июль 19-та Эстафетаныӊ чөөн талакы маршрудун Новосибирск хоорайдан эгелээн. Ол эстафета Моолду таварааш, Красноярск хоорайга август 18-те доостур.
Эстафетаныӊ чөөн талакы угланыышкынныӊ киржикчилери 180 км маӊнап эртер. Новосибирск областыӊ, Алтай крайныӊ, Алтай Республиканыӊ хоорайларын таварааш, июль 31-де күрүне кызыгаарын эрткеш, Моолга барып чораан.
Август 5-тен тура Тыва Республиканыӊ, Хакас Республиканыӊ, Красноярск крайныӊ девискээринге аян чоруун уламчылаар.
Эстафетага эӊ-не кол чүүл— киржири. Эстафета командазы-биле кады каш метр черни маӊнаан, факелге дегген кижи бүрүзүн ачы-буянныг Гармония эстафетазыныӊ киржикчизи деп санаар.
Эстафетаныӊ киржикчилерин деткип, төрээн чериӊерге Гармонияныӊ факелин тудуп, команда-биле кады маӊнап эртиӊер!
Кызыл хоорай чагыргазыныӊ медээлеринден Р. ДЕМЧИК белеткээн.
"Шын" №59, 2023 чылдың август 9