Найысылалдың база бир идепкейжи хөй-ниити организацияларының бирээзи - Хоочуннар эвилели. Олар болгаш волонтерлар апрель 7-де база катап чыглып, ТШО-да киржип турар оолдарга эңмек-дуза болзун дээш, чер-бажыңчыгаштарга ажыглаарынга эптиг, кылымал лааларны кылганнар.
Ук хемчегни Эвилелдиң даргазы Ольга Дамдын организастап эрттирген. Чогум кылымал лааны канчаар кылырының дугайында тайылбырлап тургаш, Александра Саая көргүзүскен. Аңаа херек материалдар- консерва саваларын хоочуннар Кызылдың аңгы –аңгы кафелеринден неледя дургузунда чыггаш, 300 чедирип алган. Ооң аңгыда хөй кадыг саазыннар херек болган. Ону садыглардан саазын хааржактарны чыып тургаш, үүрмектеп белеткеп алганнар. Шак ындыг саазынны лаа өзээнге ажыглаарга, хөй ышталбас болуп турар. Оон аңгыда, ындыг лаалар кырынга сугну, аъш-чемни база чылдып ап болур. Ол ышкаш соок оңгуларны бичии-даа болза, чылдыптар аргалыг.
А лаа кылыр парафинни ТР-ниң Улусчу фронтузу тып берген.
Александра Сааяның чугаазы-биле шак ындыг, хол-биле кылган лаалар 8 шак дургузунда кывар, анаа лаалар 1, 5 шак болгаш, төнүп каар болуп турар.
300 лаа белеткээр ажылга “Аныяк гвардия” аныяктар организациязындан идепкейжилер база киришкен. Олар консерва банкаларын аштап чуурунга дузалашканнар.
Кызылдың Хоочуннар эвилели бо ачы-дуза акциязынга киржиринче бүгү чурттакчы чонну кыйгырып турар. Апрель 10-га чедир Ленинг куждумчузунда 12 дугаар бажыңның подвалынга “Бай-Хаак Аква” деп сугну, сереңге, саазын салфеткаларны болгаш лаа кылырынга чугула чүүлдерни болдунар шаанче эккеп болурун дыңнадып турар.
Кызылдың Хоочуннар эвилели шак мындыг идепкейжи чоруун бо дөрт дугаар көргүзүп, ырак черде эрес-дидим дайылдажып турар чаңгыс чер чуртугларывысты деткип турарын сагындырып каалы.
Бир дугаарында, хоочуннарның ачы-дузазы- 15 муң рубльди чыггаш, чоруткан. Ийи дугаарында, чылыг хептер чыып чоруткан, үш дугаарында- “Субедейниң эртенги чееми” деп чемни белеткээш чоруткан, дөрт дугаарында – кылымал лааларны белеткеп эгелээннери бо.
Кызылдың Хоочуннар организациязы чүгле ачы-дуза акцияларын организастаарындан аңгыда боттары неделя санында ийи катап чыглып, танцылап, йогалап база турар. Удавас олар боттарының бетекеп алган танцыларын чонга көргүзер дээн.
Кызылдың мэриязының медээзи
#Шынсолун#Акция#КызылдыңХоочуннарэвилели
#ТШОачыдузаакциязы
