Чаңгыс аай күрүне шылгалдазы (ЕГЭ) дужаар пункт бүрүзүнге ада-иелер туруп болур. Шылгалдалар үезинде ажы-төлүнүң эрге-ажыын канчаар сагып турарын ада-ие хайгаарап болур дээрзин Россияның өөредилге болгаш эртем адырында хайгаарал талазы-биле федералдыг албанның удуртукчузу Анзор Музаев дыңнадып турар.
Ол ышкаш 2026 чылга чедир химия, физика, литература, төөгү, информатика база даштыкы дылдарга ЕГЭ даалгаларының перспективтиг үлегерлерин тургузар. Оон аңгыда, ОГЭ-ниң (кол күрүне шылгалдазы) технологияларын ЕГЭ-же нептередир. А 2030 чылда ОГЭ-ни компьютер хевиринче шилчидер деп, Анзор Музаев медеглээн. Ол ышкаш математика ЕГЭ-зи чаарттынар. Дээди өөредилге черлериниң аңгы-аңгы тускай эртемнеринге чаңчыктырары-биле ниити билиг биле география шылгалдаларынга чаа даалгаларны шенээр.
Бойдус-эртем талазы-биле эртемнерниң ЕГЭ-же шенелделиг кезээн киирер ажыл чоруп эгелээнин Россөөредилге хайгааралының удуртукчузу дыңнаткан. Ол чүүл ылап болур дээр болза, шылгалда дужаар шупту пунктуларны эргежок чугула дериг-херексел-биле дериир ужурлуг деп ол демдеглээн.
Доозукчуларга чедиишкиннерин көргүскен хуу портфолиоларны тургузуп эгелээр деп, Анзор Музаев дыңнаткан. Ындыг портфолиоларны дээди өөредилге черлеринче хүлээп алыышкын кампаниязының үезинде ЕГЭ-ниң түңнелдери-биле кады өөренип көөр.
«Объясняем.РФ» сайттан алган.
Чурукту интернет четкизинден хоолгалаан.
“Шын” №14 2025 чылдың апрель 17