Хөр-Тайга ортумак школазында бо хүннерде 180 оолдар, уруглар өөренип турар, 33 башкы ажылда хаара туттунган. Оларның бирээ-зи – «РФ-тиң өөредилгезиниң тергиини», дөрт кижи – «РФ-тиң өөредилгезиниң хүндүлүг ажылдакчызы», бир баш- кы – «ТР-ниң өөредилгезиниң алдарлыг ажылдакчызы» деп аттарның эдилекчилери. Школада кадрлар четчир. Оларның 39,3 хуузу дээди эртемниг башкылар, 45,4 хуузу бир дугаар категорияның башкылары. Школа тургустунгандан бээр 3000 ажыг өөреникчини доостурган. Хөр-Тайга ортумак школазын дооскаш, эртем-билигге чедип алгаш, чүгле Тываның эвес, а Россияның аңгы-аңгы булуңнарында амыдырап чоруур төлептиг хамаатылар хөй. Оон ыңай директорнуң медеглээни-биле алырга, школаның эге класстарын изиг чем-биле хандырар ажылдар доктаамал болуп турар.
Сүт-Хөл кожууннуң Хөр-Тайга сумузунга «Ада-иелерниң агрошколазы» төлевилелдиң байырлыг ажыдыышкыны болуп эрткен. Ук төлевилел Россияның «Билиг» ниитилелиниң бот-идепкейлиг ада-иелер каттыжылгазын деткиир сорулгалыг Бүгү-россияның мөөрейинге грантыны тиилеп алган.
Агрошколаны ажыдып тургаш, өөреникчилерге мастер-класстарны, күскү ярмарканы, ада-иелер аразынга кулинарлыг мөөрейни организастаан. Ол ышкаш массалыг флешмоб база концерт көргүзүглери байырлалды улам аян-шинчи киирген.
«Школавыстың ада-иелер каттыжылгазының төлевилели мөөрейге тиилээш, 1 сая рубльди чаалап алган. Ол акша-хөреңги-биле школада поликарбонаттан 2 улуг теплицаны, автоматчыткан суггарылга системазын, огород суггарарынга херек кудукту кактыргаш, келир чазын тарыыр ногаа аймааның болгаш чечектерниң үрезиннерин садып алган бис» – деп, школаның директору Долаана Монгуш чугаалаан.
«Ада-иелерниң агрошколазы» өөредилге албан чериниң материал-техниктиг баазазын экижидеринге дузалыг болгаш кижизидилге ажылынга таарымчалыг деп, башкылар демдеглеп турар.
Школаның девискээринде чаңгыс-даа бок чок, арыг-силиг. Улуг херим иштинде теплица бар. Ону эрги интернат тудуунуң соңгаларын солааш, ооң-биле кылган. Чылдың-на ногаазын тарып, күзүн дүжүдүн ажаап, өөреникчилерин ажылга өөредип турар дээрзин ажыл-агыйжы сургакчылаашкыннар үезинде көрген бис.
Олча ОНДАР.
Чуруктарны интернеттен алган.
“Шын” №36 2025 чылдың сентябрь 18
