Ийи-Талда республиканың аграр школа-интернадынга чылдың-на Улуг Тиилелге хүнүнге тураскааткан байырлыг парад-чыскаалды эрттирип, класстар аразынга чыскаалып марштаарынга, рапорт дужаарынга мөөрейни эрттирип турар.
Бо чылын Улуг Тиилелгениң 78-ки чылында база марштаарынга, рапорт дужаарынга, ырлаарынга мөөрейни эрттирип, тиилекчи класстарны илереткен. Школаның өөреникчилеринден аңгыда "Хамнаарак" уруглар садының чаштары база парадка киришкен.
Команда аайы-биле чыскаалган, чаңгыс аай формалыг марштаан чаштарны, өөреникчилерни көргеш башкылары, ада-иелер чаптап, адыш часкаашкыннарын үзүк чокка уругларга сөңнээн.
Парад-чыскаалга эң-не чырык, чараш формалыг, дески чыскаалдыг болгаш марштыг болган 8-ки класстың өөреникчилери (башкызы А.С.Санчы) улуг класстар аразындан тиилээннер. Эге класстардан 4-кү классчылар шыырак болганнар. Эң тергиин командирлерни 8-ки классчы Мирослав Аракчааны база 4-кү классчы Күдерек Дөмүр-оолду шаңнаан.
Улуг-Хем кожууннуң медээзи-биле.
