Февраль 9-та “Аэропорт Кызыл” ФУБ-ка Хамааты авиацияның хүнүнге тураскааткан байырлыг хемчег болуп эрткен.
Аңаа бүдүрүлгениң директору Олег Бады профессионал байырлалы-биле чыылганнарга байыр чедиргеш, авиация адырының хөгжүлдези дээш коллективте кижи бүрүзүнүң хүн бүрүде кылып турар шудургу күш-ажылының көскү херечизи – Кызылдың аэропорту "Россияның агаар хаалгазы" XII национал шаңналдың "Чылдың тергиин биче хемчээлдиг аэропорту" номинацияга лауреат болганын дыңнаткаш, четтиргенин илереткен.
Болган байырлыг хемчегге ТР-ниң Дээди Хуралының депутады Эрес Хуурак, ТР-ниң Орук-транспорт комплекизиниң яамызындан оралакчы сайыт Денис Хангай киржип келгеш, бүдүрүлгениң шылгараңгай ажылдакчыларынга тус-тузунда шаңналдарны тывыскан.
Байырлыг хурал соонда ук бүдүрүлгениң ажылдакчылары боттарының белеткеп алганы солун концерт номерлери-биле чыылганнарга байырланчыг шинчи киирген.
Сагындырып каар чүүл – 1946 чылда Тываның авиация бүдүрүлгези тургустунуп, Кызылдың аэропорту ажылдап эгелээнинден бээр бо чылын, 2026 чылда, Тываның хамааты авиациязы 80 чыл оюн демдеглээр.
Бистиң корр.
Чуруктарны интернеттен алган.
“Шын” №5 2026 чылдың февраль 12
