Республиканың онкология диспансери грипп болгаш чидиг респираторлуг вирус инфекциязының нептереңгей үезиниң эгезинде оран-саваларны дүрген дезинфекциялаар амгы үениң көжүп чоруур ОДВ комплекизин бодунуң акша-хөреңгизи-биле садып алган. Аппарат кыска хуусаада оран-саваны дезинфекциялаарынга дузалаар болгаш эмчи процедураларының соонда, ол ышкаш эпидемиологтуг айыылдың улгаткан үелеринде аарыг кижилерниң болгаш ажылдакчыларның айыыл чок чоруун хандырар.
Аппаратты кезиишкин өрээлдеринге, реанимация салбырларынга, эмнээшкин өрээлдеринге болгаш өске-даа эргежок чугула өрээлдерге халдавыр чок арыг байдалдарны тургузарынга ажыглап турар. Херекселдиң эң-не кол эки талазы – оран-сава иштин дүрген болгаш шынарлыг арыглаары. Аппарат озон чок чавыс базыышкынныг амальгама лампалары-биле дериттинген. Амальгамалыг ультрафиолет херелдериниң чаңчылчаан кварц лампаларындан ылгалы кижилерге хоралыг озонну үндүрбес.
Арыглаашкын соонда өрээлди агаарлаткан херээ чок. Ол операциялар аразында үени кызырыптар аргалыг, оран-сава чайгаар-ла боду кижилерге шуут айыыл чок апаар.
Ук дериг-херексел шимчээшкин датчиктери болгаш угаанныг башкарылга системазы-биле дериттинген. Арыглаашкын чоруп турар өрээлче бир-ле кижи душ бооп азы чөпшээрел чокка кирип келген таварылгада, шимчээшкин датчиктери херелдениишкинни шуут айыыл чок болдуруп, дораан-на агрегатты өжүрүптер. Эжиктерни хаапкан соонда, дериг-херексел чайгаар-ла ажылдаарын уламчылай бээр.
Эмнелге черинде эмнедип чыдар кижилерге халдавырлыг аарыгларның чыпшына бээр айыылын тургуспазынга бо аппарат дузалаар. Ылаңгыя аарыгларга удур туржур күжү кошкак кижилерге ол кончуг чугула. Ол бичии-даа халдавыр тургуспас арыг-силигни тударынга ажыглаар, кол сорулгазы кижилерниң амы-тынын камгалаарынче угланган амгы үениң айыыл чок дериг-херексели-дир.
Көжүп чоруур ОДВ дериг-херекселин онкология диспансеринде тургусканы бедик деңнелдиг эмчи дузазын чедирер болгаш айыыл чок байдалды калбаа-биле тургузар мурнакчы технологияларны каттыштырарының база бир базымы-дыр.
“Шын” №35 2005 чылдың сентябрь 11