Тывага июль 1-ден август 1-ге чедир Айыыл чок чорук айын чарлаан. Бо чылын республиканың Чазаа кандыг-бир чаңгыс угланыышкынче кызыгаарланмайн, акцияның иштинге хөй-ниитиниң амыдыралының шупту адырларынга оперативтиг болгаш профилактиктиг хемчеглерни нептереткен.
Чаңчыл ёзугаар уругларның айыыл чок чоруунче улуг кичээнгейни салып турар. Чижээ, назы четпээннер херектериниң талазы-биле комиссиялар болгаш инспекцияларның учёдунда турар элээдилерни онза кичээнгейге алган. Чедимчелиг эвес деп санадып турар өг-бүлелерни харыысалгалыг албан черлери хайгааралга алган.
Аңгы-аңгы ведомстволарның төлээлеринден тургустунган команда уругларның дыштанылга лагерьлерин хынап турар. Оларның мурнунда салдынган сорулга — лагерьлерниң администрациялары уругларның айыыл чок чоруунга хамаарышкан эргежок чугула шупту байдалды хандырганын көөрү. Ооң иштинде санитарлыг нормалар, кемдээшкин болдурбазының профилактиказы, эмчилерниң, психологтарның болгаш өске-даа специалистерниң ажылы кирип турар.
Ол ышкаш Айыыл чок чорук айының планында орук шимчээшкининиң айыыл чок чоруун хандырар талазы-биле хемчеглер, эзирик транспорт башкарып турар кижилерни илередири болгаш хөй кижи чыылган черлерни айыыл чок организастаары кирип турар.
Бистиң корр.
Чурукту ТР-ниң Чазааның парлалга албанындан алган.
“Шын” №27 2025 чылдың июль 17