Мал-маганны кадат чокка одарже үндүрүптери орук озал-ондактарының болуп турар чылдагааннарының бирээзи апарган. Ооң түңнелинде чүгле мал эвес, кижилер база оларның өнчү-хөреңгизи шыңгыы когаралга таваржып турар.
Ынчангаш мал ээлеринге дараазында дүрүмнерни сагыыры чугула: мал-маганын кадат чокка арттырбас. Бо дээрге мал ээлериниң сагыыр ужурлуг кол дүрүмү-дүр. Силерниң кичээнгейлиг чорууңар хөй айыыл-халаптарны болдурбас дээрзин утпаңар!
Орук чоогунга мал кадарарда оваарымчалыг болур. Чүге дээрге ол мал-маганга-даа, чолаачыларга-даа айыылдыг чер бооп болур. Тускай, чырып турар пөстү ажыглаңар. Караңгыда чырып турар пөс кескиндизи дириг амытаннарны көскү кылдыр кылыптар – ол чүгле хоойлу эвес, а силерниң хүлээлгеңер база болгай. Флуоресцентилиг будук-биле малдың мыйызын азы кудуруун чаар. Бир эвес орук кыдыынга кадарчы чок мал көрүп кагзыңарза, чогуур албан черлеринче дамчыдыптыңар. Малын кадат чок хостуг салганы дээш, торгаал онаар азы малыңарның бир-ле хамаатыга чедиргени когаралды эгидер апаар силер. Бир эвес силерниң кадат чокка салыпкан мал-маганыңарның уржуундан орук озал-ондаа болуп, бир-ле кижи кемдеп, бертик-межел артканда, бир болза амы-тынындан чарылган болза, кеземче херээн оттурар дээрзин сактып алыңар. Одар-белчиир дүрүмнерин сагыыры чугула. Ол дээрге бир-ле дугаарында орукта чоруур кижи бүрүзүнүң айыыл чок чоруу-дур. Оруктарывысты айыыл чок кылып, кижилерниң-даа, мал-маганның-даа амы-тынын, кадыын камнап, кадагалаалыңар.
Бистиң корр.
Чурукту интернет четкизинден хоолгалаан.
“Шын” №34 2025 чылдың сентябрь 4