Төрээн чуртувус ыдыктары
Тыва чонга ыдыктыг Буура тайганың эдээнде каас-чараш агаар-бойдустуг Эъжим деп черде кырында кижи бажы дег борбак ак даштыг даш көжээ бар. Ооң ады “Ак-Баштыг”. Бир эвес ол дашты көжээниң кырындан кайы-бир кижи дүжүр идиптер азы өскээр аппарып кааптар болза, бир хонганда ол даш көжээ кырынче эглип келген боор. А демги багай кижи албан-на бак чүүлге таваржыр. Ындыг тоолчургу чугаа Ак-Баштыгны улам тывызыксыг болдурган.
Эъжимниң чонунга Ак-Баштыг – ыдыктыг. Шаг шаандан бээр тус черниң чону Ак-Баштыгны чылдың-на дагып, тараа-быдаа байлак дүжүттүг, мал-маган семис-шыырак, амыдырал-чуртталга эки болурун дилеп, чалбарып чорааннар.
Бо чылын Ак-Баштыгның дагылгазын Адыг-Түлүштерниң улуг аймаа эрттирген. Шаг-төөгүден чаагай чаңчыл ёзугаар Ак-Баштыгга мөгейип, аъш-чемивистиң дээжизин сөңнеп, чер-чуртувус амыр-чаагай, эл-чонувус өөр-өнер, бүгү-ле ажыл-үүле чогунгур болурун ыдыктыг Ак-Баштыгдан дилеп чалбардывыс.
Дагылга үезинде оюн-тоглааны, тыва хүрешке маргылдааны организастап эрттирдивис.
Тахир МЕКПЕР-ООЛ.
Авторнуң тырттырган чуруктары.
“Шын” №25 2025 чылдың июль 3
