Март 4-те Делегейниң херээженнер хүнүн уткуштур Ак-Довурак хоорайның Кадр-оол Сагды аттыг культура Ордузунга «Кадын - 2023» чараш кыстар мөөрейи болуп эрткен. Аңаа хоорайның албан организацияларының 25-тен 35 харга чедир төлээлери киришкен. Мөөрей бедик деңнелге эрткен дугайын организакчылар дыңнаткан.
Даңгыналар мөөрейге боттарының уран-талантызын болгаш тывызык каас-чаражын көргүзүп, кежээниң каастакчылары болган.
Культура ажылдакчылары даңгыналарның шылгалда мөөрейлер аразында көрүкчүлерни бичии-даа чалгааратпайн, оларга хөглүг оюн-тоглаазын бараалгатканнар.
Мөөрейниң деткикчилеринге культура Ордузунуң ажылдакчылары болгаш организакчылар өөрүп четтиргенин илередип, бүгү херээжен чонга Март 8-биле байыр чедиргеннер.
Шаңналдыг черлерге төлептиг болган даңгыналарга дипломнар, ленталар, деткикчилерниң белек кылдыр сөңнээн сертификаттарын болгаш өске-даа үнелиг шаңналдарны тывыскан.
