Тываның Баштыңы Владислав Ховалыг өөредилге объектилерин чаартыр программаны боттандырып турар төлевилел организациязының төлээлери база чогуур яамылар болгаш ведомстволар удуртукчулары-биле хуралды эрттирген. Хурал үезинде ажылдар амгы үеде кайы хире чоруп турарын база республиканың өөредилге черлеринде инфраструктураны оон-даа хөгжүдери дээш регионалдыг-даа, федералдыг-даа деңнелге шиитпирлээр ужурлуг айтырыгларны чугаалашкан.
Владислав Ховалыг хуралдың шиитпири-биле 2026 чылда Ак-Довурактың 3 дугаар школазынга капитал септелге чорудары планнаттынган деп бодунуң телеграм-каналынга дыңнаткан. Ниити билиг школазы 1983 чылдың август айда ажыттынган. Эрткен чылдарда 700 хире өөреникчи өөренип турар дөрт каът улуг школага чаңгыс-даа улуг септелге кылбаан.
Сөөлгү чылдарда национал төлевилелдер болгаш федералдыг программаларның күүселдези-биле республиканың өөредилге черлериниң инфраструктуразын көскүзү-биле экижиткенин Тываның Баштыңы сагындырган.
«2022 чылдан бээр «Өөредилге», «Аныяктар болгаш уруглар» национал төлевилелдерниң, ол ышкаш «Көдээ суурларның комплекстиг хөгжүлдези» федералдыг программа күүселдези-биле Тывада 11 чаа школалар туттунган. Бо хүнде уруглар амгы үениң бүгү-ле негелделеринге дүгжүп турар улуг делгем школаларда өөренип турар. Бо чылын ыраккы болгаш чедери берге Мөңгүн-Тайга кожууннуң Кызыл-Хая суурда чаа школа тудуун доозар. Оон аңгыда школаларга капитал септелге кылыр программаже 50 объектини кииргеш, бо хүнде оларны бүрүнү-биле чаартып дерээн бис» — деп, Владислав Ховалыг бижээн.
Хуралдың киржикчилери аварийлиг байдалда школаларны база чугаалашкан. Шуй, Ээрбек, Черби, Аяңгаты, Ишкин, Торгалыг суурларда эвээш санныг өөреникчилерлиг ниити өөредилге албан черлериниң оран-савалары шак ындыг школаларга хамааржыр. Ооң-биле чергелештир чурттакчы чоннуң саны көвүдеп турар чамдык кожуун төптеринде школаның шөлү чедишпестеп эгелээнин демдеглээн.
Владислав Ховалыг ол айтырыгны шиитпирлээри-биле, эвээш комплектилиг школалар тудар план барын дыңнаткан. Шак ындыг өөредилге черлерин тудар төлевилелдер ажылы эрткен чылын-на эгелээн болгаш, бо удаада дөзевилекчилер боттарының саналдарын республиканың удуртукчузунга таныштырган.
«Школа өөредилге системаларын чаартыры» деп федералдыг программа күүселдези-биле 2022 болгаш 2023 чылдарда Ак-Довуракта ийи ниити өөредилге албан черинге — 1 дугаар школага база «Өлчей» лицейинге капитал септелгелерни чорутканын демдеглезе чогуур.
Тываның эрге-чагыргазы 2030 чылга чедир республикада ам-даа 13 школага капитал септелгени чорударын планнаан. 2025 чылдан эгелеп «Аныяктар болгаш уруглар» национал төлевилелдиң «Уругларга бүгү-ле экини» федералдыг программазы ёзугаар өөредилге адырында инфраструктураны чаартыр төлевилелдерни боттандырар. 2025 чылда бо программа күүселдези-биле Тываның Хову-Аксы, Терлиг-Хая, Бора-Тайга, Чыргалаңды, Сукпак, Аксы-Барлык, Кызыл-Даг суурларда чеди школага капитал септелгелерни кылган.
ТР-ниң Чазааның парлалга албаны.
“Шын №2 2025 чылдың январь 22