Казымал байлактарны ажыглаар талазы-биле Россия Федерациязының федералдыг агентилелиниң чоруткан аукционунуң түңнелдери-биле Тываның Ак-Сугда чес-порфир чыдынын болбаазырадып ажыглаар эргени “Ростех” күрүне корпорациязының “Кедилиг даг-руда төлевилелдери” (“Перспективные горнорудные проекты”) акционерлиг ниитилели ойнап алган.
Бо болуушкунну Тываның Баштыңы Владислав Ховалыг “Ростех” күрүне корпорациязы-биле кады ажылдажылганың чаа бедик деңнели кылдыр үнелээн.
“Ростех” күрүне корпорациязының компанияларының бирээзи хая-даш буза чазылдырарынга ажыглаар частыр бүдүмелдерни бүдүрүп үндүрер бүдүрүлгени ажыглалга киирген. Ол дээрге бистиң регионга шыңгыы ажылдарны “Ростех” күрүне корпорациязы чорударының херечизи-дир. Оон аңгыда, бо корпорацияның база бир компаниязы Эрзин кожуунда Тастыгда литий чыдынын болбаазырадып, шиңгээдип алыр ажылдарны чорудуп турар. Ол дээрге узун хуусаалыг чугула кады ажылдажылганың стратегтиг сорулгаларының чижээ-дир” – деп, В. Ховалыг чугаалаан. “Ростех” күрүне корпорациязының ажыл-чорудулгазының Тывага ужур-дузазының дугайында Россияның Президентизи Владимир Путинниң чоокта чаа эрттиргени чөвүлел хуралга сайгарып чугаалашканын база Тываның Баштыңы сагындырган.
Тывага боттандырар деп турар инвестиция төлевилелдеринге ажылдаар тускай эртемниг специалистерни тус черниң чурттакчыларының аразындан белеткээр талазы-биле кады ажылдажылга эгелээнин Владислав Ховалыг дыңнаткан. Тывага чугула инвестиция төлевилелдериниң бирээзи – Тожу кожуунну электри энергиязы-биле доктаамал хандырары. Бо төлевилелди Россия Федерациязының Чазааның Даргазының бирги оралакчызы Денис Мантуровтуң чоокта чаа эрттирген чөвүлел хуралга болгаш Тываның Баштыңы Владислав Ховалыг биле ооң хууда ужуражыышкыннарының үезинде база сайгарып чугаалашкан. Тожу кожуунну электри энергиязы-биле доктаамал хандырарының төлевилели Тываны электри энергиязы-биле хандырарының Комплекстиг планынче кирер ужурлуг деп, В. Ховалыг демдеглээн.
Бистиң корр.
“Шын” №91 2024 чылдың ноябрь 27